أم رحيق ـــ كم إنت زولة عظيمة ــ للمرة التانية رحيق هي الأولي

[ناصر يوسف]

المشاركة الأصلية كتبت بواسطة سارة

الف الف مبروك يا سمية والف الف مبروك يا ناصر
ربنا يحفظكم ويحفظ عيالكم
من نعم الله على عباده نجابة الابناء ربنا يغطى عليها وعليكم

والله سمية المستحملاك دى العظمة ليها شوية

بلا وجدى الاسعد لا بتيخ

ما قلتي غير الحق يا أخت الست الفُضلي سمية أم رحيق
شكراً ليك ،،، وتاني شكراً ليك علي البتييييييييخ الأسعد
ههههههههههههه

[ناصر يوسف]

المشاركة الأصلية كتبت بواسطة وجدي الأسعد الأسعد

واللاي يا ناصر يا فردة اظنك خايف من غسيل العدة ساااااي

لكن بالجد بالجد لو رحيق كان مصدرها ما تمام
كان زماااان بتلقى ام رحيق قال ليك هووووي انا بتك دي زهجتني
دي بت بليدة وانا فترت منها , تاني ما بشتغل بيها

لكن ولله الحمد رحيق مصدرها كان مية المية
لدرجة انو ام رحيق زاتو لقت متعة في متابعة رحيق والتعلم منها ^ــ^

مافي مرةّ بتفلح في شىء الا اذا كان الشيء اصلن فالح من قولة تيت ^ــ^

*تنبيه
رحيق لا تدخل ضمن تنصيف النسوان
لانو اصلن رحيق مصدرها سليم عشان كدة طلعت من التصنيف دا ودخلت تصنيف الملائكة

يعلم الله العِدَّة بغسلها والهديمات كمان بغسِلِن وبكويهِن
عِلا المَسِح ده ما بقدر عليه في شان الغضروف يا جميل

وكلو بالمزاج ،،، يعني ما عندنا أوامر ،،، وحتي الأغنية البايخة السجمانه ديك ما عندنا ليها بكان في بيتنا

أمي خاته الحِنَه وأبوي بغسل العِدَه

ولا هي بقولوها كيفن

[المليجي]

المشاركة الأصلية كتبت بواسطة ناصر يوسف

أها ما لقيت فرصة عمل للطالب المجتهد داك لسسسسه ؟؟؟
هههههههههههههههههه

لووووووووولووووووووول
عندي فيزة كايبوي كدي اتشاور معاهو وادوني رايكم

[حافظ حسين]

مبروك يا رحيق و مزيد من التقدم
و يا ناصر أمسك قوي

[أسعد]

لوووول يا ناصر
اظنك اتحسست مني ^ــ^

ياخ علي الدين من اول مداخلة لي وانا خاشي زول هظار وضحك
فالتحية لام رحيق
فالبني ادم اصلن زي الصلصال
اصوله حترجع لطبيعة تكوينه اثناء طفولته
وبالتاكيد ام رحيق كانت نحاتة ماجدة لانها قدرت تنحت رحيق يوم

[المليجي]

المشاركة الأصلية كتبت بواسطة وجدي الأسعد الأسعد

لوووول يا ناصر
اظنك اتحسست مني ^ــ^

ياخ علي الدين من اول مداخلة لي وانا خاشي زول هظار وضحك
فالتحية لام رحيق
فالبني ادم اصلن زي الصلصال
اصوله حترجع لطبيعة تكوينه اثناء طفولته
وبالتاكيد ام رحيق كانت نحاتة ماجدة لانها قدرت تنحت رحيق يوم

حنكك بيش يا دبل اسعد

[somiaadam]

تهانينا المليونيه لام رحيق وابو رحيق وعقبال ان تنال اعالي
الدرجات العلميه وتكون زخرا لاهلها ووطنها

وشكرا لك لاعطاء ام رحيق حقها فهي تستحق

واوعك من كلام اخونا وجدي

دمتم بخير

[أسعد]

المشاركة الأصلية كتبت بواسطة المليجي

حنكك بيش يا دبل اسعد

واللاي انا زاتي قتا كدة







بس اخدت في الاعتبار انو النسوان ديل ما عندهن طايوق
فاعتقدت جازما انو حنكي ح يمشي في ام رحيق ^ـــــ^

[احمد سيداحمد]

المشاركة الأصلية كتبت بواسطة المليجي

لووووووووولووووووووول
عندي فيزة كايبوي كدي اتشاور معاهو وادوني رايكم

حترسل الفيزا متين يا عاطلgapgap

[الجيلى أحمد]

ياناصر

كدى ياأخى خلينى شوية مع صاحباتى الحلوات
رحيق ونغم ..المشلعيب ملحوق (واليويكند يادوب بدا)

كانت السماء لتوها على استعدادها الكامل للتخلى عن ضوء الشمس , حين دخلنا المصفى ..مصفاة الجيلى .. ناصر يبدو هناك ك (براد بيت) .. يلقون عليه التحية تباعآ وبالفة .. الزيارة عندهم صعبة والمكوث أيضآ, ولكنه استطاع ترتيب الأمر بشكل (ناصرى).. دخلنا الى شقته , حكى لى فى السلم عن لوعته فى عيد الاستقلال
وشعوره الذى أطبق عليه بانه يحتفى به وحيدآ فى فضاء المكان , ثم كيف أوقد شموعآ
وكيف انه استطاع أن يصنع عيدآ , ومال على خاطرته حاكيآ لى عن أطفال الشارع (الشماسة) وكيف انه قضى معهم رأس السنة على أطراف المجارى , فى جو لايخلو من طنين العذاب .. ونحن نصعد السلم كنت أستمع لوقع خطواته ولترتيب حديثه الذى بدأ فى التقطع ..اييييههه ياصاحبى , اللياقة تعبانة
من البيت ينبع عطر سودانى , خليط من بخور , ورائحة بهارات , وعبق صوت أطفال .. أكرمتنا ست الدار , وتحلقت حولنا نغم ورحيق كرزاز دعاش .. الأكل ثم القهوة ,
صلينا ثم جلسنا فى البلكونة ,
الشاى فى البدء ثم القهوة
ست الدار تحوم علينا مقاطعة بتعليق أو ضحكة منطلقة , والمساء يتسرب نحو الظلام بتؤدة وطمأنينة.. تحدثنا وأكواب القهوة تفرغ ذاتها فى الحنين.., عتَمنا المكان بدخان السجائر , ثم قال صاحبى
- قيم كوتشينة كيف مع الشباب ؟
- والله ياناصر لى يمكن عشرة سنين مادقيت كوتشينة , لكن لو بتلعبو وست الليلة انت مسَيك..
- يافردة جماعتنا ديل ناس حريق ..
وقال بلهجته الآمرة تلك ,
- يلَا خش فى الجلابية دى ..
الجلابية برغم أناقتها الا انها منتفخة قليلآ

كشاتين محترمة
التقول لاعبين بى بقر ,
أناس لطاف , ويبدو انهم أكرمونى فوق الاستحقاق , فلقد كنت على الدوام أول الحارقين, ولكننى بقيت على الطاولة ..
هاتفنى النور يوسف .. خرجت الى الحديقة ..هاتفنى أخى أحمد..
ثم هاتفتنى أمى متعللة بذات ماقاله أخى أحمد ( بأن العشاء سيبرد) , وتذكرت اننى الآن فى بيوت تنتظرنى على العشاء ,
فكم اذآ ضاع من العمر دون منتظرين على العشاء؟

فياصديقى
ان للمصفأة نغم ورحيق

[اشتياق]

الف مبروك لرحيق ربنا يحفظها ويقر بيها عيونكم
وربنا يخلي ليك السيده ام رحيق الفضلي
ويخليكم كلكم لبعض ..الرجل الدي يعترف بفضل وتعب شريكة دربه لاشك انه عظيم
وايضا يستحق التكريم كام رحيق ...ربنا يحفظكم ويديم الموده ومزيد من النجاحات

[الجيلى أحمد]

ياوجدى ياأخى بطل الفرفرة البتعمل فيها دى
واستسلم من بدرى ,

كل ما اتأخرت فى المسألة دى
كلما قضيتك بقت أصعب ..

ياأخى انت بى طبعك مخرف
يعنى لوخرَفتا براك حاتعمل فينا شنو تانى؟
_______
عندى ليك فيديو ابن لزينا,
من امبارح الناس هنا مدورين فيهو نقة
(عن اختصار البايبل)
داير ليهو مشاهدة بى مزاج
بجدعو ليك فى المشلعيب ..
بس خلينى ألقى الفيرشن الكامل , وأشوف مضايرة لمسألة الترجمة

[اشرف السر]

المشاركة الأصلية كتبت بواسطة الجيلى أحمد

تحافظ على مخزونها من الكلام بالصمت
وتستعيض بابتسامة خليط من الشوطنة والبراءة ..

البراءة أكيد من امها


الشوطنة دي من منو يا ربي؟

[طارق صديق كانديك]

نعم الاله على العباد كثيرة وأجلهن نجابة الابناء

مبروك لرحيق وليكم يا ناصر ياخي

بالتوفيق دائما يارب

[سارة]

المشاركة الأصلية كتبت بواسطة وجدي الأسعد الأسعد

واللاي انا زاتي قتا كدة







بس اخدت في الاعتبار انو النسوان ديل ما عندهن طايوق
فاعتقدت جازما انو حنكي ح يمشي في ام رحيق ^ـــــ^

هن لو عندهن طايوق كان لقيت واحدة مطرطشة رضت بيك بس الحمد لله
البقن بلا طايوق

وحنك عاضى يا فردة شوف غيرو