اقتباس:
المشاركة الأصلية كتبت بواسطة سارة
وجدى يا اسعد انا زاتى مرات بتشعلق حكمة ربنا
المهم يا فردة نرجع لكلامك ات قلت..
لكن لمن يحصل الغضب، حينها تذهب الفكرة وتأتي سكرة الغضب
ودا موضوع البوست الاساسى يعنى لما يحصل الغضب ويصبح القوم سكارى
هنا نعمل بمبدأ السكران فى ذمة الواعى والواعى هنا اللائحة والقائمين على امرها
والاعضاء الما سكرانيين شفت كيف يعنى المطالبة بالتحضر فى الحوار يعنى
قال ليكم ازعلوا لما تنفقع مرارتكم لكن سكر(بضم السين) ما معانا وقع ليك؟؟؟
|
تمام يا منقا
بس كدي ركزي معاي، عشان ح اكرر كلامي مرة تانية
أنا Nokia Lumia وعندي كمبيوتر ونت، وقمت عملت بحث في النت ولقيت سودانيات... قمت سجلت واشتركت كعضو ووافقت على اللائحة، طبعا موافقتي على اللائحة ليس معناها أني ح ألتزم بيها 100%... أكيد ح تحصل مني أخطأ وبالتالي ح اتحمل أخطائي وتبعاتها على حسب ما هو منصوص في اللائحة...
أها قمت أول بوست فتحتو كان بعنوان (الحضارة النوكيابية أعظم حضارة عرفها تاريخ الموبايلات)... وبي حسن نية قمت اعدد في مفاخر حضارة اجدادي وعظمتهم... وعن نقاء وطهارة الجنس النوكيابي... البوست دا كلو حصل بي حسن نية...
هنا قام جاني Iphone6 (ما خالد غالي)* ناطي وبي حسن نية منو... قام انتقد عنصريتي البغيضة هذه وعشان ينفس لي فقاعة وهمتي في أسلافي، قعد يعدد لي في عيوبهم ومساؤيهم ومشاكلهم وعلاتهم... الكلام دا برضو كان بي حسن نية
قمت أنا هنا زعلت واتحمقت على كمية الاساءات والشتايم التي كالها المدعو Iphone6 على أجدادي العظماء... وأخدتني حمية انتمائي وولائي لهم وقمت قعدت أشتم وألعن في المدعو Iphone6 وسبيت ليهو أبوهو ايفون 5 ومقدساته (آبل استور)ورسول ديانته (ستيف جوبز)...
الآن عاوز أطرح عليك ثلاثة أسئلة، الرجاء الالتزام بها:
السؤال الأول:
ما هو المطلوب مني وأنا في غمرة غضبتي هذه في دفاعي عن شرف أجدادي وابائي العظماء؟
هل المطلوب أني أبقى زول كويس وما أشتم؟
بس المشكلة أني ما شايف نفسي قاعد اشتم... بل شايف نفسي أني بدافع عن كمية الأذى الذي تم الحاقه بابائي واجدادي العظماء... أها انتي لمن تجي تطلبي مني أني ما اغضب .. انتي بتكوني بتطلبي مني أني اتخلى عن فقاعة عمرها عشرات السنين راسخة في عقلي الباطن وأقوم اتنازل عنها ببساطة كدة ؟َ!
منطقيا كدة مستحيل أني اتخلى عن عقيدة وأيمان راسخ في عقلي الباطن منذ نشأتي ولحدي تاريخ المشكلة... بصورة أوضح أنا رجل دائري الشكل، لذلك صعب جدا أني اتناسب مع الشكل المربع المثالي الذي تتوقعه مني...
يبقى في الحالة دي ما هو الحل؟!
السؤال الثاني:
ما هو الضرر الذي سببته للقاريء سارة؟!
السؤال الثالث:
ما هو الضرر الذي سببته لمنتدى الحوار؟!
*بعد البحث والتقصي تم اكتشاف ان خالد غالي عبارة عن موبايل اركسيون ابو قرن بامية