فرض رسوم علي المواقع السودانية الالكترونيه
مركز الخاتم عدلان عمل ليهوا ندوة عن المواقع السودانيه واثرها في اثراء الحركة الادبية والثقافيه واستدلوا ببعض المواقع السودانية التي اصبحت مرجع لكثير من الجهات الاخباريه والصحفيه لسهولة المعلومة وتناولها الخبر بقناة الشروق تم استضافة احد مطبلاتية الانقاذ من الصحفيين علي الهواء وبالاقمار لابداء وجهة نظره حيث صرح باننا نحبو في مجال المواقع مقارنه بي دول الجوار وان الدولة يجب ان تعمل الية لضبط حركة انشاء المواقع بموجب تراخيص من الدولة.
تراخيص يا راجل الواحد عايز اعمل ليهوا محل دعاره اسف اقصد مساج في الخرطوم عشان اطلع ترخيص يعني حكاية التراخيص دي ماشه معاكم بقت رزق وفتحوا الله الترخيص الجمركي للعربة برادو 95 مليون ما يعادل اكثر من سعر السيارة البرادو علي الزيرو.... واحد معرفة تم تعينوا وزير ولائي قابلت اخوهوا ابارك ليهوا الوزاره خلاس بعد كده بقوا باشوات بعد المباركه الراجل قال لي الزول ده قلنا ليهوا احسن ليك غربتك دي الراتب البتاخذو هنا اكثر من راتب الوزير الظاهر اخوهوا ده داقس هنالك المخصصات الغير منظوره في الشهر تصديق تصديقين لاعفاء جمركي واحد برادو والتاني لاندكروزر لمدة اربعة شهور تبني عماره وما خفي اعظم.
عايزين تسترزقوا من المساكين ناس خالد الحاج وابوبكر ووليد الحسين والبقيه من اصحاب المواقع الحمد لله احنا ناس كتابة سااااااااكت .... خلاس الجنوبيين حا اشيلوا البترول بتاعم ومشوا من حسي بقيتوا تفتشوا لي مصادر الدخل الاخري ما لا يقل عن 500 موقع سوداني علي الشبكه الان يعني لو تم فرض رسوم شهريه دي تكون حسبه حظك يا بتاع الثقافه ده كان ما المتعافي قال عايز حقوا نسبة لان تلك المواقع تمر بي الاجواء الاقليميه الخاصه به وبعد داك كل ولاية تتطالب بي حقها وهاك يا نقاط تفاتيش يعني موقع مدني نت من بوتسوان عشان اصل مدني اكون اتقشط وفلس المصيبة الكبيره تحصل مشكله بين بتاع الثقافة والسياحه عن احقية مال الترخيص لوزارته وبعد كده اخشوا ناس المواقع الفنية والتقنية والكل يطالب بي حقوا بتاع الزراعه بعد طار مشروع الجزيره يصدر قرار بعدم اصدار اي ترخيص لموقع زراعي مالم تتم الموافقه عليه من قبل الوزارة ودفع الرسوم المقرره ..... الموقف العام بقي مظلم في السودان بعد حكاية شركة الاتصالات الكثيره واكل اموال الغير بالباطل في الكلام البشيلوا الهواء الناس ديل بعد شوية بقبلوا علي الكلام الطائر ساكت اطاقش في الجو كلام المواقع.... يعني حسي بي الحسبه الجديده بعد التراخيص كلامي ده اكون بي كم .
|
