عارفني بحبك كيف؟
.
عارفني بحبك كيف؟
حاولت أقول ليك كم مرة
حكاية طفلة بتحلم بين إيديك
بي نقطة ضو .. أو قمرة
وتطلع من جواك تتشابى حنين وتغني
ولامن تشرق منك ضحكة صباح
تفرهد كل أركان الجوف تملاها كلام
ألوان من طيف
لوحات بتزغرد من دون خوف
وفي جواي تترتب إلفة
تعريشة شوق
قهوة ببن الحب وايقاع فنجان
ضحكات تتهادى كما المالوف
فرِشنا الرملة .. غُتانا ضليل الشاتي الشوف
إمتد مراحل فيني سنين
زمن ما طلت طفلة بتلعب من جواي
خدودها الريد
عيونها بتلمع فيها خطوط
عوالم تحكي ضجيج عينيك
كم مرة تشوفك شايل إسمي
تمسك طرف الجوف تتشابى حنين
يمكن تلمس حرف الشوف
وكل ما تقرب .. انت تغمض
كل ما تقرب .. انت تغمض
وأمرق من جواك واسأل ..
عارفني بحبك كيف؟
|
