ساندرا كدودة...أو اللهم جميلة

[أميرى]

جميلة هذا إسمها و هي كذلك ما إن يحدثك عنها أحدهم حتي تلمع عيناه وتظلله غمامة...تمتهن بيع الشاي والقهوة و لا تبخل بالإبتسامة،،جبنتها بالصف و و خت الطوب و يازول دة مكاني و كو كرو،،،
في المساء تمتهن الفن وتغني بأشياءها كلها،،صدرها يرتج باللحن والخصر يميل،،والناس تمسكها الهلا هلا حتي أن حفلها الأخير شهد حالة تحرش جماعية وتناولتها النيران الصديقة كوجبة عشاء ساخنة ،،ما حلاها من الجمع الهائج إلا رجل صالح إستل خنجرا و حركه صوب كل إتجاهات نشوة السابلة ،،،

بعد الحادثة بشهر جرجت جميلة من بيتها فتوقف لاندكروز مظلل خرج منه بعض الرجال وحملوها قسرا إلي داخلها
ولم تعد بعدها حتي الآن
....
القصة حقيقية بكل تفاصيلها و جرت وقائعها قي الفاو و ضواحيها
و علي النخبة الشمالية المحتفية بساندرا مراعاة المساواة ف الزخم ..

اللهم جميلة

[رأفت ميلاد]

سلامات يا أميرى ومشتاقين

راجيك من أمبارح تجى راجع تتم الحكاية .. ساندرا عندها ضهر ووقف ليها ووقف معاها وهلل ليها .. أها جميلة أبقى ليها ضهر وأكشف وساخات الناس دى وأفضحم ونحن معاك

لكن مافى مقارنات بين الإتنين

[النور يوسف محمد]

بسم الله الرحمن الرحيم


سلام أميرى ،

وهكذا نحن ،
ومتى ما نسقط حظوظ النفوس من حاجاتنا يبقى الناتج صفراً كبيراً ،،

تم إنا مشتاقون ياخ

[اشرف السر]

أميري...

لا تستويان..

لا في الظرف...
ولا في الضهر

لساندرا حزب تاريخي يقف منافحاُ عنها بكوادره
ولجميلة غبن تاريخي..
يتململ

[عبد المنعم حضيري]

زاهي الحروف اميري

اندى التحايا

ساندرا وجميلة كلتاهما ضحية ظلام توشحت به ليالينا .. فهل يحق لنا ان نحلم بانبلاج فجر النور لنهزم ذلك الليل الطويل...

تحياتي

[أميرى]

المشاركة الأصلية كتبت بواسطة رأفت ميلاد

لكن مافى مقارنات بين الإتنين

سلامات يا مقدس والشوق أكتر والله

يا مقدس من متين الموقف السياسي بدي ميزة وأفضلية لشخص علي شخص!!
مافي مقارنة بينهم في نضال سياسي أو جاكات نضالية لكن الحق ف الحرية واحد والحق في الحياة واحد كانت ساندرا العظيمة أو مجرد فتاة من غمار الموالي فقيرة الأرومة والمنبت
...
الحكاية حكاها لي رفيق سفر مسا الخميس كنت راجع من مدني وجنبي شاب كاهلي من ريفي الفاو رأي جميلة رأي العين كان يحكي بحزن حتي قلت ليته سكت

لجميلة رب يحميها
المهم سقنا بعيرنا و مرقنا

[رأفت ميلاد]

المشاركة الأصلية كتبت بواسطة أميرى

سلامات يا مقدس والشوق أكتر والله

يا مقدس من متين الموقف السياسي بدي ميزة وأفضلية لشخص علي شخص!!
مافي مقارنة بينهم في نضال سياسي أو جاكات نضالية لكن الحق ف الحرية واحد والحق في الحياة واحد كانت ساندرا العظيمة أو مجرد فتاة من غمار الموالي فقيرة الأرومة والمنبت
...
الحكاية حكاها لي رفيق سفر مسا الخميس كنت راجع من مدني وجنبي شاب كاهلي من ريفي الفاو رأي جميلة رأي العين كان يحكي بحزن حتي قلت ليته سكت

لجميلة رب يحميها
المهم سقنا بعيرنا و مرقنا

(يا مقدس من متين الموقف السياسي بدي ميزة وأفضلية لشخص علي شخص!!)

فى بلادنا طوالى الحال كده يا أميرى .. شهيدين بموتوا فى ليلة واحده .. واحد بعمل ضجة ويملا الأخبار وواحد بتاكلو الصقور .. يعنى قضية ساندرا ما أكبر من البموتوا بدون ذنب بالطيارات فى جبال النوبة ودار فور

قصدى أقول ساندرا وأهل ساندرا وحزب ساندرا كتر خيرم الفضحوا عصابة الأمن .. رموها فى الشارع وهربوا الجبناء عشان الضغط العليهم .. أما جميلة وغيرا وغيرا من الما سمعنا بيهم ليهم الله يشيلوهم لحم ويرموهم عضم

لكن ساندرا النفدت بى جلدها ما ليها ذنب .. عشان كده قصة جميلة محتاجة زول يبحت فبها ويمشى محل الواقعة ويجيب شهود ووقائع وصور ويجعل منها قضية موش رواية عابرة لبت مسكينة

للمقارنات شوف قصة لبنى والمئات الإترفعن فى البكاسى وإنجلدن فى الأقسام .. حتى الجنوبيات الكانن مع لبنى التم التنفيذ فيهن فوراً الجاب سيرتن منو!!

[سجمان]

سلام يا أميري..

جابني حرفك بعد طول غياب..

أبقى عافية..