حبايبنا رمضان كريم وتصوموا وتفطروا على خير
قبل فترة كنت داخل على الفيس بدون موضوع كالعادة
وقاااام الفيس قال لي : ( بماذا تفكر؟ )
طبعاً كان جادي جداً
فقمت أنا بدون جدية قعدت أغني ليهو ، غنيت :
بماذا تفكر ؟
بفكر أكون زي خلوق الله ديل
مسالم مسامح
وطيب عديل
أميل بالوجود في اتجاه الجميل
واحاول أكون في الرمال سلسبيل
بل برغم عتام الفؤاد البيبسم عبوس
أجوس شان أجود بي هداوة النفوس
أو بإحساس نفيس
ياخ أكون زول عديل ..
وبس لم اعاين لواقعي الصريح
بلاقي الملامح التفر حين تشوفني وأقول تستريح
بدال ما تداوي الجراح تستبيح
تستبيح المشاعر التنوح حين تفارق حبيبه وتنز بالنويح
يا طريح الطموح
يا جموح
يا مليح
ما كفاك من كفاك
من غناك و المديح
يا صريح ما بيصح حين تحب .. تنجرح
حين تصون تتهم بالخيانة وتسمى (وقح)
حين تمط أغنياتك عشان ترضي غيرك تقع ... تتنتح
كمان حين تجود بالمعاك
تتهم بي جفاك
أو بتسلب عيونك
وتفضل دموعك
تسيل من جروحك
وما بتتمسح
هن عيوني البعاد من عيوني وقراب من يقيني
وبتاور حنينن
يعم صدري ضيقة
وبيكتم معاي المكان وينفتح
باب هذا الجحيم الملاني و رشح
ما كفاك من كفاك
من غناك
ياخ أريت لو أكون
أو أفوت واسترح ...
ما عندي موضوع ... موش؟؟؟؟؟؟