عـِيـَنْ الخريف

[الرشيد اسماعيل محمود]

بابكر عباس،،،
النترة تحتمل هذا الاجتهاد!
اغنية الحماسة بتقول :
الفارس النتر بي جاي،
اخوي شقيقي براي
النترة في رأيي ما ليها علاقة بالنثرة!

....
ما داير اوصف مداخلتك بالضعف!

[شبارقة]

المشاركة الأصلية كتبت بواسطة الرشيد اسماعيل محمود

اغنية الحماسة بتقول :
الفارس النتر بي جاي،
اخوي شقيقي براي

حباب الرشيد العريس

الهدف من البوست ده هو إضاءة وتعريف وتبسيط لمسميات عـِينات الخريف .. وهناك ناس كتيرين سامعين بيها لكن ما بيعرفوها وما بيعرفو ترتيبها .. والأيام دي ح يهل علينا الخريف وقلنا دي مناسبة ... وقد تختلف المسميات ويمكن يكون ما عندها علاقة بالأسد أصلا ً (وهي فعلا ً بالنجوم) ولكن أهلنا رمزوا ليها بالأسد في التراث بتاعنا (يمكن عشان يسهل حفظ ترتيبها) .. بلادنا ما زالت كبيرة وواسعة (شعوبا ً وقبائل) ولذلك قد يختلف تعريف بعض المسميات ما بين البطانة والنيل الأزرق والجزيرة وكردفان ودارفور إلخ .. وثقافتنا سماعية .. وقوقل ما بيكون سمع بيها زاتو (في بوست مصطلحات عامية كنت بديهم كلمة وقول ليهم أمشوا فتشوها في قوقل وأنا متأكد تماما ً إنو قوقل ما ح يعرفها )

في أوبريت سودانية (المنسوب للشريف الهندي) بيقول:

بت الحر .. وأم الحر .. وأخت الحر
وسـِت الضنبو مردوم .. بي وراهو يجر
وسـِت الفي الخـُشش من العصير بنتر
وسـِت الخيل وسـِت الفي القلوب بنقر
وأم الحلفوا بيك وبالعذاب المر
ما بختولِك الشينة ومناحة الكر

وعندنا في مناطقنا .. البعض يقول ليك : والله نترني نترة لمن فكّ لي سدري ..( المعنى جذبه إليه بقوة) ..

شكرا ً يا الرشيد ياخي .. تسلم،،،

[شبارقة]

جانا الضـُراع والغيث دفـــق في الوادي
أنبسط البلد لي بلادي شلـــــــــت عتادي
أصلـّح في الكسور كل مرة أطفـّر غادي
جافيت المقيل طاري ام خدود في بُعادي

جافيت المقيل طاري ام خدود في بُعادي .. حاجة كده زي : ولقد ذكرتك والرماح نواهل ٌ مني

[شبارقة]

العـِينـة التالتة : الطَـرفة

تبدأ الطرفة من يوم 4 أغسطس إلى 17 أغسطس .. والطرفة هي عين الأسد لما تطرف .. وتسمى الطرفة الندّاية بسبب كثرة الندى على النباتات وأوراق الاشجار ويعود السبب للمطر الليلي .. وتسمى كمان الطرفة البكـّاية

مطرها خفيف وناعم وقد يستمر طول الليل أو طول النهار .. يقيف شوية ويواصل تاني وهكذا طول اليوم .. وبيسموها الشكشاكة ... تقيف شوية بالليل تقوم تـِطـِّلع عنقريبك عشان تنوم تجيك تاني وهكذا .... متعة والله.

قال سماعين ود حد الزين : وعشان ما تبكي ببكي أنا واحاكي الطرفة في عز الخريف بكـّاي

[شبارقة]

أمهاتنا وحبوباتنا كانن بيعانن من الطرفة لأنو اليوم كلو المطرة تشكشك .. الحطب يتبلبل والفحم كذلك والغـُشغـُش

والوليدات والصبيان كمان بيعانوا من رفع التراب فوق البيوت عشان الطرفة بتعمل على صببان البيوت ... لأنها سقـّاية.

والآن نفتح المجال لأخونا حافظ حسين عشان يعمل لينا سياحة خريفية مع الطرفة البكـّاية والندّاية.

[شبارقة]

إتذكرتا لي حاجتين الأولى كلمة (زخـات) البنسمعا في النشرات الجوية وأعتقد أنها تماثل مطر الطرفة (الشكشاكة) .. والحاجة التانية هي مقولة (أنا الطرفة أم دموع البختاني يشيل تيرابو ويزوع) .. الطرفة تفتخر

[خالد غالي]

ياجماعة ماسألناكم من الدعاش، مالكم ما اشتغلتو بي؟!


احرد ليكم البوست ده انا

[حافظ حسين]

المشاركة الأصلية كتبت بواسطة خالد غالي

ياجماعة ماسألناكم من الدعاش، مالكم ما اشتغلتو بي؟!


احرد ليكم البوست ده انا

الدعاش ياهو الدعاش و لا داير تعمل لينا فيها حنكوش

[شبارقة]

المشاركة الأصلية كتبت بواسطة خالد غالي

اعتقد والله اعلم انو فات عليكم ان تذكروا بان اهم مايميز عينة الضراع هو الرائحة الجميلة المسماة الدعاش

(ما كان كفي بين كفك في وداعك غير إشعاع البروق يشدُنا
عبق الدعاش إذا بدا في غير موسمه الخريف)
او كما قال عالم عباس محمد نور
واعتقد ان رائحة الدعاش المميزة تنتج بعد اختلاط اول زخات المطر مع تربة الصعيد الخصبة المخلوطة ببعض انواع الحشائش اليابسة مامتذكر اسمها شنو
تحياتي ومحبتي للجميع

المشاركة الأصلية كتبت بواسطة خالد غالي

ياجماعة ماسألناكم من الدعاش، مالكم ما اشتغلتو بي؟!

احرد ليكم البوست ده انا

أخونا خالد غالي .. الغالي
ياخي نحن متين لقيناك عشان تحردنا ياخ

أنا طبعا ً رحبت بيك وقتها وقلت ح أرجع ليكم برواقة لكن شكلي نسيت أمر الرجوع ده بسبب زنـّة كده في رأسي (ما بسبب رمضان .. بسبب العمل)

تعريفك للدعاش ما مكتمل .. والدعاش فعلا ً مرتبط بموسم الخريف كما قال أستاذنا عالم عباس:

يشدُنا عبق الدعاش إذا بدا في غير موسمه الخريف

الدعاش في تعريفي له هو النسيم (في موسم الخريف) مخلوط بريحة الطين والمطر وممكن يجيك من مسافة قريبة وممكن من البعيد ... نحن دعاشنا السمح بجينا من الصعيد (سنجة والدمازين والرصيرص) وأب رخم وسنار.

ببعض انواع الحشائش اليابسة مامتذكر اسمها شنو

يا ريت تتذكر لينا الاسم .. أو أنتظر أخونا حافظ عشان يديك خيارات .

شكرا ً يا غالي ... تسلم ،،،