أسرار الرومى – ماجدة بابكر
السيدة فيروز طبعا، مدرسة متفردة فى كل شئ، فى الأداء وفى طريقة الغناء والتطريب، بداية بالحضور والوقفة وإنتهاءا بصوت الملائكة العجيب.
إنتهت، عمليا يعنى، مرحلة عاصى ومنصور الرحبانى وفيلمون وهبى وإيلى شويرى، وبدت مرحلة زياد الرحبانى مع فيروز، مع أمه، وبرضو تواصل التفرد وإن كان فى طعم ومذاق مختلف.
خفنا، نحن المبتلين بى الغناء السمح الما عادى، وختينا إيدينا الإتنين فى قلبنا وقلنا خلاص، شويه كده وتتوقف الإبداعات الفيروزية السماوية، لكين الله دائما كريم وما بنسانا.
وجاتنا بنت "حليم الرومى" شايله معاها طعم موية الجبل وخضرة الأرز ونسمات البقاع، جات "ماجدة الرومى" وجانا معاها فيض غامر من الغناء المتفرد والأداء العجيب والصوت الأوبرالى والحضور المحترم، المحترم جدا، وتانى إتأكدنا إنه الله ما ناسينا، وأكيد ما حينسانا
ده فى الغناء البرانى
أما فى الغناء الجوانى
حصل لينا نفس الشى بعد ما "حنان النيل" قالت خلاص، "نو مور مارفلس آند تشارمنج كرييشن" وقلنا خلاص نسد إضنينا ونعلن الصوم من السمع والطرب العالى السامى، لكين برضو الله كريم، وما فقدنا الأمل
وفجأة جادت السماء بالغيث والمدد الإلهى، وفتحت الملائكة خزائن "أسرار" الصوت وكنوز الطرب الثمين.
جاتنا "اسرار بابكر" ويا ربى ليك الحمد والشكر على نعمك الما بتنتهى، ياخ نحن محظوظين والله نعيش فى زمن فيهو كل الجمال والألق ده، يا ربى ليك الحمد والشكر
يوم الجمعة الفاتت، يا داب لميت فى ألبوم "اسرار بابكر" الجديد "راحت عليك" وبركة الما راحت على، كنت أنا ذاتى رحت
أول ما يلفت النظر فى الألبوم الجديد، هو الأثر الظاهر فى توظيف صوت اسرار بى طريقة جديدة، ودى ميزة الشى لما يبقى مجيه ومميز، وضح الأثر الأكاديمى وبدت الدراسة العلمية الصحيحة تأتى أكلها
"مدات" الصوت بقى فيها شبه كبير بى مدات صوت ماجدة الرومى، وليه لا، زيادة الجمال جمالين، وزيادة الخير مليون خير، هو نحن لاقين بالله.
أكيد طبعا التشبيه هنا بى طريقة أداء ماجدة الرومى ما فيهو تقليل من صوت وطريقة أداء اسرار، بقدر ما فيهو إعلاء لشأن الجمال وفرح عارم تفتح ورود اكتر وفوح عبير أزيد، هو نحن لاقين ؟
ومجموعة الأغنيات، باقة منمقة وزاهية ونضيرة، الحقيبة تشع بريق كالعادة، من أبو صلاح وهلاله الما نظر غيره لحدى الأغنيات التانيات، والأغنيات الجديدة قمة فى الذوق فى الإختيار وألحان مموسقة بديعة جدا وموزعة موسيقيا بى طريقة سلسة وحلوة، وده موضوع تانى عايز تفصيل.
إن شاء الله يا اسرار تسعدى وتطيبى وتلقى الدايراهو فى مرادك، زى ما اسعدتينا و "صحيتى فى قلوبنا الوجود ورجعتى لى عيونا النهار"
نهار الغناء السمح ووجود الطرب العالى السامى
|
