[ناصر يوسف]

شكراً إيمان محمد حسين فما زلتي تعلمينا معني أن يكون الإنسان إنسان

شكراً لك أخي مدني السماني وأنت تشاطر رفيقة دربك الحياة وتُعلمنا معني الوفاء والإنتماء

شكراً لجميع الذين حضروا عبر هذا البوست أو عبر الهاتف أو بأنفسهم يوم أمس


إيمان وهي تحكي عن زيارتها القصيرة للسودان والمليئة بالموجب

أطفال مدني وإيمان ( مي / أليسار وداني) ... دي أول مره يجوا السودان ...

كانت الزيارة موجبة بالنسبة ليهم كتير

تقول مي مدني:

نحن كنا مفتكرين السودان ده في فلكرتنا ليهو ( أدغال إفريقيا) وكنا مفتكرين إنو السودانيين ديل ناس كعبين من الشفناهم هناك في بلجيكا ... لكن حقيقي السودان بلد جميييييييييييييل جداً والناس هنا طيبة للغاية ... وأنا لأول مرة أستغرب لمنظر زول شايل ليهو ساندوتش بياكل فيهو ويجي زول ماشي وهو أصلاً ما بعرفو يقول ليه ... إتفضل

وتشاركها برضو أليسار أختها في الرأي ... أما الود الفنان ( داني مدني) فده زول براااااااهو .... السودان في نظرو بلد جميل وهو مبسووووووووووووط جداً


يحكي لي مدني السماني:

أول أمس جو ناس قناة النيل الأزرق سجلوا حلقة مع إيمان في البيت وهي بتحكي عن محنة رحلتها مع مرض السرطان ... ولأول مرة أشوف دموع بناتي وداني وهم بيشوفوا وبيستمعوا لأمهم وهي بتحكي لقناة تلفزيونية عن رحلتها مع السرطان ... حقيقي أقدر أقول إنو زيارةتنا للسودان المرة دي زيارة موفقة من جميع النواحي ... وفيها الشئ المفيد للغاية للأولاد علي الصعيد الشخصي

تحدثت بالأمس إيمان عن تفاصيل زيارتها للأطفال المصابين بالسرطان بالمركز القومي للطب النووي (الذرة) ...

مريض السرطان وبعد ما ياخد جرعة الكيميائي ... المفروض إنو يكون لوحده داخل غرفة شبه مُظلمة ولفترة ثلاثة أيام علي أقل تقدير ... وما رأيته صباح اليوم شئ لا يُصدق ... أطفال قاعدين في الشمس أو في العراء ... الماخدين الجُرعه أهلهم من حولهم ... يعني تلقي زول قاعد ليهو جنب راسهو وزول قاعد جنبو في السرير وتانيين واقفين وبيتونسوا وبصوت عالي ... والمسألة محتاجه لنشر الوعي لأهل مريض السرطان وكيف يتعاملوا مع مريضهم ...

والأطفال الشفتهم اليوم ديل حقيقي محتاجين لرعاية أكتر ومحتاجين لتوفير العلاج بشكل أفضل وحتي مسألة عشرة سراير تنويم للمرضي المفروض إنو الفكرة دي تتغير ... لازم كل مريض تكون عندو غرفه لوحده

الكيميائي ده زي السِم أو نقول زي موية النار ... بيتخلخل داخل الجسم عشان يقتل الخلايا السرطانية داخل الجسم .. ودي مسألة حقيقي محتاج فيها مريض السرطان بإنو لازم يفضل لوحده بعد أخد الجُرعه مباشرةً ... يقعد في جو هااااااادئ





شكراً ليك إيمان وإنتي تُعلمينا الكثير عن أشياء ... كنت عن نفسي أجهلها تماماً ..

ويلا يا شباب ... المسألة محتاجه لرفع نسبة الوعي لدي أهلنا ...