كتب حبيبنا ود أبوعاقلة :
اقتباس:
داب حرفنة ؟؟
شوف
الحتة بتاعة الخدود الشاربة من لون الشفق دي حتة خطرة خلاص ...
لكن ود أختك قام شال اللون دا ذاتو وكشحو في الليل ...
وطلعت معاي الابيات دي...
خَرتّ من الخدود لونك كشحتو على الضلام روّاب ...
خاف الليل على نفسو وفتّح للصباح أبواب
عتقتك للمطر والغيم ...
عشقتك ما أظن كضاب (استاذ فضيلي جماع قال لي خليها عشقتك واصلو ما كضاب  )
مكانك وين .. عيونك وين ...
ومين حقن السفر فينا ورمانا ورا الحدود أغراب ...
ومين حقن السفر فينا .. وخلانا .. بدون أحباب ...
|
كان هذا ردا علي تعقيبي علي اهداء له تضمن أغنية
(الخدود الشاربة من لون الشفق عند المغارب)
لشاعرنا اسامعيل حسن وألحان الموسيقار وردي وغناء عثمان مصطفي ..
وكنت قد كتبت :
اقتباس:
اقتباس:
غايتو يا ابن أختي مافي شي يتقال غير انك زول فنان .. أي والله ..
وطبعا ده ما كسير تلج لأنو الشغل وخلص ..
(خَرتّ من الخدود لونك كشحتو على الضلام روّاب ...
خاف الليل على نفسو وفتّح للصباح أبواب)
رغم أنك أخدت الفكرة من كلمات اسماعيل حسن لكنك يا صاحب
ألبستها ثوب جديد ..
والعامية أدتها نكهة النعناع ..
|
(تحسس الرجل) فكتب :
اقتباس:
اقتباس:
علي باليمين وما طالبني حليفة سماعين دا نهائي ما جا في بالي وكتها ...
احتمال مزيكتي بتشبه مزازيكو في المقطع دا تحديدا ودا شي طبيعي لمن تقرا لقامة زيو ..
عشان ما تاخدونا في الرجلين ساي ...
سنسراتك ماشاءالله ما اطقها عين ...
وسلامك احتمال اوصلو واحتمال لأ لأني ممكن اموت في أي لحظة ...
تسلم يا هبّاش ...
|
وطبعا حبيبنا محمد لا يحتاج أن يحلف .. أنا والله مصدقو ...
والمسألة هنا أبدا ماها "سرقة فكرة" بل هي استشفاف للجمال .. والتقاء معاني مدفونة في الناس الجميلة ، وصاحبنا قطع شك زول جميل ..
والمسألة قادتني إلي نماذج أخري تشابهت فيها المعاني ...
يقول شاعرنا العباسي في قصيدته عهد جيرون :
"أرقت من طول هم بات يعرونى يثير من لاعج الذكرى ويشجونى
منيت نفسى آمالا يماطلنى بها زمانى من حين الى حين
ألقى بصبرى جسام الحادثات ولى عزم أصد به ما قد يلاقينى
ولا أتوق لحال لا تلائمها حالى ، ولا منزل اللذات يلهينى
ولست أرضى من الدنيا وإن عظمت إلا الذى بجميل الذكر يرضينى
وكيف أقبل أسباب الهوان ولى آباء صدق من الغر الميامين
النازلين على حكم العلا أبداً من زينوا الكون منهم أى تزيين
من كل أروع فى أكتاده لبد كالليث والليث لا يغضى على هون"
وكان قد سبقه علي الفكرة مجنون بني عامر أو مجنون ليلي حين قال :
"ياللرجال لهم بات يعروني مستطرف وقديم كاد يبليني
من عاذري من غريم غير ذي عسر يأبي فيمطلني ديني ويلويني
أطعته وعصيت الناس كلهم في أمره وهواه وهو يعصيني"
تشابهت المعاني والقافية وان اختلف الطالب والمطلوب.
ثم أخذتني ذاكرتي إلي شاعر آخر .. إدريس جماع عليه الرحمة حين قال :
"أعلى الجمال تغار منا ماذا عليك اذا نظرنا
هي نظرة تنسى الوقار وتسعد الروح المعنى
دنياي انت وفرحتي ومنى الفؤاد إذا تمنى
انت السماء بدت لنا واستعصمت بالبعد عنا
آنست فيك قداسة ولمست اشراقا وفنا
ونظرت في عينيك آفاقا واسرارا ومعنى"
وقد سبقه المجنون ايضا في المعني حين قال :
"أقول لأصحابي هي الشمس ضوءها قريب ولكن في تناولها بعد
غزتني جنود الحب من كل جانب إذا حان من جند قفول أتي جند "
فيا صديقي حاشاك "السرقة" انما هي أرواح المبدعين يسقي بعضها البعض.. وما هي إلا معان يستشفها الأنقياء والشفيفين ..
أبقي طيب .
[flash=http://www.youtube.com/v/bekILWM2C6I?autoplay=1]WIDTH=500 HEIGHT=500[/flash]