[عبدالحكيم]

المشاركة الأصلية كتبت بواسطة سجمان

ويين اختفيت.. خليت وراك صهلي الحروف.. تلهث من السكك البقت ودارة.. والدارة اتملت شقيق محوطة بالعويل.. وانا في قفاك شهودت حلما في رجاك.. يااااالله حسن الخاتمة.. ويااااالله مَرَقَتْ من ثنيّات الشُراع.. شيّعتو لي مثواه في اقصى البقاع.. ما دا البشلهت في الفراق.. الذكرى والحلم… العشم.. والوحدة يا خل ان غِبَتْ.. خاطرك هواجس الاشتهى.. ممنونة هي المرقت حروف غنياتنا.. فتّشت العيوش.. من ود عكر.. شِبْعن زرازير الهواجس.. وما قنع خاطر الغنا..ولا العشم.. الكان قبيل..شلناهو للقاك انتهى..

يا الله وين دافن تواريبك..لا حس لا خبر.. حق الله ما بجيبك.. بالله عليك ماب تشتهي المرقت سنون الدابي.. مرّقت العَقَرّب في دريبك.. ماك مشتهي الراجيها حول.. تربالنا لي فوسيبك.. ماك مشتهي البشقت حَبْل السعف.. شدت علي القداد عناقريبك.. والنسيمات.. الدعاش.. والخِبِير الجانا طاش.. قالو المطامير انسرف عودا.. ودفق جمام نمير الناحو لي غروبك.. وقّحلنا الشقّاق.. وطَاتَك فينا مي حايقة.. اذا ما كنت فوق راسا.. ورغم المطرة مي رايقة.. بلملم شملها البرّاق.. متين يا خي تطل فوقنا.. علينا الدمعة مي لايقة.. رقاد الحوش مع النقناق.. وجهجهة الدخول والمرقة.. للجات من الكريم سايقا.. نضافة الحلة والدرّاو.. وجَلْط الباندقة الحولا.. قبل ما يمر وتتشقا..وتبقى اوَضْنَا متضايقة.. خريف الحلة يا حليلو.. حليل الناس وكت تجدع تواريبا.. وتحاحي الطير من الحبة.. وتقعد في التروس فايقة..عميرنا نضب.. خلاس ضنب العمر رقة..في ساساق وغربة كضب.. الا عشمنا في الاخر.. نعود من تاني لي بلودنا..وخريفنا الجاي بننهل منو لو بُقّة..
تَجُوبِكْ فينا بي شوقك.. اولُو هامّيك.. تعال يا خلي ماك مشتاق.. تَبَرْكِتْ مننا الحاصل.. تناجي غنانا ونناجيك.. نكون عايشين ويا دوبك.. نعود من تاني للراحة وهداوة البال.. تلمنا تاني في توبك..

في يات مكان دسّيت غناك
الناوحني واتقالدني وكت الحاجة
قفّل ذرايع الغفلة وكتين العيون لجلاجة
ودفق الفرحة في عيون الفراغ
جبّر سراويل البهجمو نعاجة
ما خلاني في السهلة
ومشي الاوحال بدون صاجة

سجمان السجمان ..
السجمان سجمان ...

لعل العنوان جاء من معنى سجمان من الدارج السوداني ،:

وهو من المعجم السوداني الدارج فأنت يا سجمان :

تعريف :
لافيده فيه شبه باوار النار بعد موت النار
:

مثال : « اخوك ده سجمان لافايدة فيه ...

اما المعجم العربي فمعنى غير ... ومن اقرب معجم فأنت يا سجمان "

أسجمَ يُسجم، إسجامًا، فهو مُسجِم، والمفعول مُسجَم (للمتعدِّي) • أسجمتِ السَّحابةُ: دامَ مطرُها. • أسجمتِ العينُ الدَّمعَ: سجمته؛ ذرفته، أسالته وصبّته.

وبالربط وعنوانك :

الى صديقي (تالف الذكر) الذي ادمن الانزواء ...

وتعريفنا الدارج لاسمك وجدت كأن في علاقة بين تالف الذكر وال هو صديقك ومن وجهت له رسالتك فهو مجهول الهوية وقد آثر الانزواء ربما لأنه تالف الذكر والتلف كما نعرف هو الفسد تلف الشي أي فسد ..
وصداقة السجمان للفاسد ممكنة وغير مستبعدة ..
كما الاختفاء صنو الانزواء ....
وهو من دس الغناء فأخفاه ..

الله يلمكم تاني تالف الذكر والسجمان توب وتركنوا للراحة وهداوة البال..

هي محاولة منك أولا ......... وجرجرة من عندي تانية