الابن العزيز ناصر , الرائعه حنينه , الدينامو ابو جقادو .... لكم التحيه والموده
جماعتنا ديل لو وصلوا هنا السويديين الطرش ديل بس كماشه قبض مسمار ما بفكو . عبدى بعد ما قبضو( وهو كان مدير البوليس فى الصومال) اهلو طلعوا مظاهرات عارمه فى استوكهولم . وصاحبه رئيس البرلمان ابو طاقيه طلب بشده من السويديين اطلا ق سراحه لان هذه الاشياء حدثت قديماً والناس دلوقت اتصالحوا . ولو ما فكوهو حتحصل مشاكل فى الصومال .
لكن السويديين ما سألوا فى زول قدموهو لمحاكمه والمحكمه حكمت باعتقاله رهن التحقيق . حبيبى ده يكون شها الناس العافيه فى الصومال زمان . دلوقت لمن اشوف صدام حسين وجماعته اقول الله يمهل ولا يهمل . وكل زول ليه يومو .
شوقى .....
عزيزى ابو جقادو .. حاولت ما ارد على موضوع احمد البلال لانو الراجل ده بعمل لى دوار بحر . انا بشوفو عشان اقنع نفسى بأنه عندى سبب ما امشى السودان . اكثر من محلستو ومسح الجوخ بتاعه ده . واجعنى ادعائه للعروبه . بالرغم من انه لو كان الوقايه عندها شنب كان تلاليشو ديل اتشتشو بالجبنه . وواجعنى انو حاسب نفسه من الصفوه واولاد المصارين البيض متنكراً لاصله كأحد ابناء الطبقه العامله . والآن يدافع عن طبقه المستفيدين . شفته الحلقه وشفته المحلسه والحلقه ادانه للانقاذ فلقد بدأت الحلقه بالاشاده بنذاهه النائب الاول وعدم لجوءه للسرقه والسطو على المال العام وتجرده والنائب الاول يغرود . وهذا يعنى ان النائب الاول شاذ ومختلف ومشاتر بالمقارنه مع زملائه فهو لا يسرق ولا يتعدى على المال العام . شئ يحير والله .
شوقى .....
|