الموضوع: قهوة النشاط !
عرض مشاركة واحدة
قديم 18-02-2009, 08:42 PM   #[14]
أبو أماني
:: كــاتب نشــط::
 
Thumbs up شكرا سيلفر ... نطالب بالمزيد ..!

اقتباس:
المشاركة الأصلية كتبت بواسطة silver مشاهدة المشاركة
الاخ ابو اماني
تحياتي
في سنة البرلم في ايامنا الاولي في الجامعة
و اثناء سيرنا انا وصاحبتي بالقرب من الكافتيريا الرئيسية في الجامعة اقترب مننا شاب
مادا لي كيس تمباك قائلا لي اتفضلي اتلفت شمال ويمين عسي ولعل يكون قاصد شخص اخر
ولكنه قال لي مالك بتتلفتي اتفضلي يا برلومة
والكافتيريا مليانة والجمهور يراغب في الموقف وبدا البعض يضحك
واختك طبعا برلومة جديدة لنج ومن الاقاليم كمان
طبعا في ذلك الزمن الموقف كان بالنسبة لي محرج شديد
وتمنيت لو اتشقت الارض وبلعتني

بعد داك عرفت انو هذا الشخص فاكة منوشوية نتيجة شاكوش كارب
وكمان مرفود من الجامعة

شكرا على المرور والمساهمة الظريفة الرائعة والتي أضحكتني من القلب..لك الشكر..برضو مرت بي واقعة مشابهة لواقعتك دي بس ما كت برلوم .. في عام 85 /86 كت جاي في إجازة قصيرة من مهجري الخليجي .. وأخوي الله يسامحه حاول يساعدني في المشاوير أداني عربيته والتي ورتني النجوم عز الضهر .. اليوم داك العربية كل ما أمشي بيها حبة تحصل فيها حاجة .. والدنيا حر يفسخ النخرة .. وطبعا العربية ماركة داتسون موديل السبعينات وكان أخوي يعاين ليها زي فارس هلالا .. وكانت أزمة المرور والبنزين والعربية التقول عندها ظار ولا شنو ما عارف!.. يعني عمركم شفتوا ليكم عربية تكح وتعطس كمان..؟ بإختصار فضل لي مشوارين شفت خلال المشاوير القبلهم الويل .. وأنا في شارع الجمهورية قريب من تقاطع صيدلية كمبال حاليا .. ومقابل محل (ميرزا) أعتقد عزيزي الخال أو السفير أبو جمال يذكروه جيدا أما الأخ عادل عسوم فمؤكد يكون تعامل معاه .. العربية ياسيدي (الأمانتي عليك) وقفت (دوت) وحلفت ببساتمها الأربعة ما تتحرك من محلها شبر .. حتى الكحة والعطس وقفتوا .. المشوار كان قريب من محلات (جينبيرت) بتاع العدة (الراقية) زمان .. ومحلات (كابريس) البقت كايرو جلابية وقفلت العربية بعد قفلت قزاز الأبواب وأمنتها عقب ركنها على جمب .. وبكرعي شلت باقي أوراقي وواصلت .. أنقنق وأطنطن وأسب سنسفيل أبو الإجازة الطيرت البرج الفاضل من نافوخي .. وأنا في هذه الموجة من السباب بصوت مسموع .. كنت واثق أنو ما في زول يراقبني فاطلقت لنفسي العنان ..(هو كان ما ساكت أنا زول فارغ .. الموديني أقبل منو أسوق عربيتو شنو؟.. يا أخي والله بلاوي الواحد بيخت روحوا .. فيها ..!! وعند هذا الحد كنت وصلت لتقاطع شارع وكان في زاوية الشارع برميل كوشه .. إكس لارج .. وكان جمب الكوشة مجنون ..كان يرمقني وإبتسامة ساخرة مضيئة .. فأرتعدت..وبخطوات مضطربة واصلت مشيتي وبدأت أطلق صفارة من فمي كالمنسجم مع نفسه وماعنده أي قضية .. غير ان المجنون .. مشي نحوي بخطى ثابته وإصرار .. وإبتسامته الشامتة تلك لم تفارق فمه .. وقال لي بكل عقلانية ... ها .. ها .. ها.. تصفر؟؟ ..كلنا بديناها كده .. يا فردة .. وصار يقهقه .. ولم اتمالك نفسي من إطلاق ساقى للريح هاربا من وجهه .. والحقيقة خفت كلامو يكون جد .. جد ..



التوقيع:
اللهم أرحمه وأغفر له ..
يشرفني أن رجلا مثله في ذمة الله قال عني يوما :-

... ولا يفوتني أن أعلن فرحتي بقلم تريان يا أبا أماني...
أنت إضافة لسودانيات مبهجة ولا شك .
رحمة الله عليك وإنا لفقدك لمحزونون
أبو أماني غير متصل   رد مع اقتباس