حكايات من الاستعفانات
أها وقتها كنت اشتغلت و اتعطلت عن العمل بسوء السلوك لكن في الشغل كنت ختري شديد ..... أها بقيت عاطل لدرجة اني بشيل حق الصعوط من حدو و و طارق أخوي شفت التدهور دا كيف؟.... أها جاء زول قريب ابوي بقروش كتار و فتح كم شركة و عمل قاعة في جامعة الخرطوم و أكل التماسيح ديل أكل جد .... أها الزول دا قال ما داير زول في القبيلة عاطل و عيال القبيلة اشتغلوا سواقين و ناس هدف برتبة غفرا و اييييك يعني بالعربي كدا بقوا قوي حديثة و بصرصروا لباقي خلق الله .... ابوي قال لي عمك فلان دا ضرب لي و سألني منكم قلت ليه عندي حافظ دا ما شغال يلا تمشي للزول دا عشان تشتغل ... قلت ليه لا يا يابا كلو و الا الشغل مع الناس ديل....
المهم ملاني فارغة شديدة تمشي تشتغل انت اصلك بتريد الفلس و الجوع أمشي اشتغل يا (.......... )هو ما بتلفظ لكن لو كان بتلفظ تموا النقاط البين القوسين دي حسب خيالكم.... حرنت و قلت كلو و الا الشغل مع الزول دا..... لاني في الوقت عندي رأي في الرأسمالية الوطنية خليك من تكون طفيلية و جاية من وين ما تعرف ... المهم تحت ضغط الوالد و الفقر قلت يا زول أمشي أنا داير اسرق معاهو ما بشتغل 8 ساعات و بتخارج....
والله قشرت في امان الله ... بنطلون الجينز و قميص معقول و جزمة زيها و زي جزم كل خلق الله.... مشيت الشركة و لاقيت زول كدا قلت ليه ... انا ود فلان الفلان من عندكم و فلان الفلان دا قال لي اجي اشتغل عندكم ... رحب بي شديد و سألني من ابوي و صحته و قلت ليه الحمد لله في زحمة من النعم .... اها طابق ورقي و خشيت للزول بتاع الكمبيوتر و ال هوي ح يعايني .... لجنة المعاينة مكونة من 3 انفار ... الزول بتاع المعاينة دا ود صغير خريج التقانة .... لابس ليه جزمة كبيرة و بنطلون كيف كيف ما عارف لكن ما اسكيني ... تي شيرت عامل سبعة في الرقبة و في شعره عامل كريم لدواعي التجلط .. أها خشيت كدا مسحني ليك بنظرة من رأسي لاخمص جزمتي و حسيت بالامتعاض في وشو .... عرفت لحظتها اني ما ح أشتغل في الحتة و في الحتة انا تاني ما بشتغل
بدت المعاينة بالاسئلة السخيفة المعروفة ديك و قالوا لي كلمنا عن نفسك.... و الله ما قصرت كلمتهم عن الميلاد و الدراسة, الشغل السابق, طموحاتي في الحياة ونقاط قوتي و ضعفي و أجمل جدعة في نقاط الضعف قلت ليهم واحدة من مشاكلي العويصة ما بعرف اشتغل في تيم فيه أغبياء ... عاينو لبعض كدا و صنو شوية .... يلا بعد كم سؤال كدا جات الاسئلة في المجال و ديلاك سكتووا و بدأ يسألني الشافع ابو دبابة كبيرة دا قال لي في ال سي في بتاعك كاتب انك اشتغلت كم سيستم باوركل هل اشتغلت باكسس؟
رديت قلت ليه: طبعا الزول البصل مرحلة يشتغل باوركل قطع شك بعرف اكسس
يلا دي اكلها في حنانو ....قام سألني الفرق شنو بين الاوركل و الفشوال بيزك؟
هنا وصلت الحد و بالعبارة دي قلت ليه (اجري الحصان) هو في علاقة عشان يكون في فرق ؟
لجنة المعاينة قلعوا عيونهم كبار .... و المعاين اب نعال كبيرة سكت لكن انا ما سكت و قلت الليله بوصلها معاهو الحد و قلت : اسمع إنت قريت وين؟
سكت و اتبرع واحد من اللجنة شكلو ما قارش ملحة الزول دا و قال لي إتخرج من التقانة؟
قلت ليه عليك الله الزول دا اتخرج سنة كم؟
في البداية اضاير لكن في النهاية لا يصح الا الصحيح و قال لي 2006 صح يا فلان ؟...
و فلان دا كاضم من الهجمة ..... و انا جاني الهبوب و ضريت العيش و عملت حركات عيال جامعة الخرطوم و قلت ليه اسمع انا اتخرجت من جامعة الخرطوم و 2005 انا كنت بتدرس الزيك دا في التفانة و انا كأستاذ ما مطالب اعرف الطالب لكن الطالب المجتهد مفروض يعرف استاذه .....
بقي يقاطع فيني يا زول راعي لكلامك يا زول احترم نفسك
ما اشتغلت بيه و الشجعني الاتنين بتاعين اللجنة كانوا متكيفين و واصلت ... قلت ليه يعني هسي انا ممكن أشتغل هنا و انت تكون مديري صدقني لو بتدوني مليون دولار ما داير و شكرا علي زمنكم
و أتخارجت
|