[align=center]
مرثية المرحوم الشريف حسين الهندي
محمد حامد السقاي
خبر الشوم بلغ الليلة جابو الناعي
قال مات الهمام نايرالبصيرة الواعي
إندك الأساس وخرالسقف مداعي
وانفرط القطيع بقى لادليل لاراعي
الموت ســنة لكن الفقد مو هين
ياالهــندي المجرد حاد سقايتو تزين
رحــيلك لوع العــنقالي والمتدين
وكم جريت وسـم بين الحواجب بين
السـودان نُكِب ياالدخري فيك يوم فقدك
ويا صلب الشكيمة المُتَّ حافظ عـهدك
الأراضـين تعج يتوم ربَّعُولك لحدك
إهتزت جبال مكة وضـرائح جـدك
أب دربــا زلـق البـاروه ملوا وفتروا
من جارحات جوارحه الجارحة لانوا وكسروا
كتار الطـلبوا أسـباب الوصـول لي قـدرو
كل القاسو صـد بالحسـرة قال : ماني قدرو
قداد الدروب شـرك المصـايد هبرو
أب عوما قَرِف بحر المخـاطر عبرو
ماظـنيتو مات بي هينة ، شايل وبرو
ملك الموت أكيد بي غفلة غفَّا وغدرو
نارك ياالشريف بين الجوانح سارجة
رمَّلت المنابر والمحـافل القاجة
فارس أمات حجول المابتقبـِّل لاجة
خليت الرجال دمـاعه تدفر سـاجة
عهدك كان رخا وكم من نعيمو غرفنا
ورايك في المحـافل ياالشريف شرَّفنا
نحن وراك زي ما قالوا عشـنا وشفنا
يا ود ابدروع قرقر وراك أب عفنة
رقد فحل الصهب تلب التقيلة اب غارب
وتمساح لجة اب موجـا بلعلع كارب
قول لي الطال عرض وانغر سما الهارب
كان عمرو طـال ما بنبرم لك شارب
رقد الليـلة تقالة القلوب الجـازعة
فاضت روحو لي باريها صـدت راجعة
قدر السـيد نفد غار الزوامل الراتعة
شال تلب الحمول خلى المجافلة وضالعة
من تبيت حصـيف قط ما بتقوم في هايفة
ونفسـك للصغاير والرغالات عايفة
في النـوم والثبات عينك مفتحة شايفة
من نعش اب كريق قالوا المرافعين خايفة
كـباس الدهم فرتاق جحافل العوق
وقشاش دمعة المتموم مغص مخنوق
أب فهما بحـل عقد الزرد مطبوق
وراك الكـبدة تنزف والقلب محروق
قنديل الكبس أب ضوا مو ممحوق
واب قدرا على عالي الكواكب يفوق
أظنك ياالشريف زايد عليك الشوق
وهزاك الحنين للأزهري وزروق
أملـنا المروق من الظـلام بي شروق
ولكن الكـريم تدبيرو مو مسـبوق
غفانا القـدر قبل الهـنية نضــوق
وجاب أمل الخلاص شايلنو في صندوق
في السودان بشوف كل النفوس موجودة
وكانت عايشـة آمالا عليك معقودة
لكن شن نسـو ما تمـت المعدودة
حكم السيد رضا وإرادتو مي مردودة
فوضـنا الأمر فيــك للكريم مولاك
وتاريخـك بخلد لي النشــور ذكراك
سائلنوا الكــريم الأخلصـك حباك
يبرد مــرقدك وعقب الجنان مثواك
مرثية المرحوم الشريف حسين الهندي
الشاعر: عبدالله الطيب
البطل المصـاب الفراقو ما بنسد
أب خلقا رضية المحاسنو مابتنعد
ياحليـل الشريف الوفى ما وعد
الجـرح المغـور الليـلة إتجدد
تاني منو براك بعرف كلام الجد
يابحر المحيط الما بحبسك سد
فوق الطنـدبة بتمرق الحد
ضقنا الويل بي وراك وصلنا الحد
فينا الضاع كتير والباقي إتشرد
كل يوم الأمل في نفوسنا يتجدد
راجين جـيتك بعدالعذاب نسعد
بي موتك ياالشريف ماتت معاك آمال
فقـدوك العدامى وعليك شـوقنا طال
ميتك سمحة ماك المرتشي المحتال
كل الحي بموت لو قصر العمر أو طال
فتحت خشم بيوت قبال ياالشريف ما تقوم
يا ضـراع الضعيف .. يانصرة المظلوم
يوم مـت ياالشريف آمالنا إتوفت
بي حالتنا الكئيبة ، كل الدول عرفت
في مفترق طـرق خليتنا نتلفت
راجين جيتك ... وانت قافلتك قفت
من قم ياالشريف حاشـاك ماكا جبان
مادرت تعيش سعيد وباقي البلد تعبان
بيتك بالعدامى طــول الوقت مليان
ضيفانو الألوف ريقـان خلف ريقان
ياحليل الشريف الخيرو ما دابو
راجنو الألوف لي جيتو بتشابو
أب رايا سديد كل الدنيا بتهابو
ما جروا القلم راجعـوا حسابو
من قمـت ياالشـريف بلدنا إتقـدم
حتى الكـان عدو من بعدك إتنـدم
كل يوم الديـون في ضهورنا تتردم
قاسينا الشدايد ما عارفين نصل يوم كم[/align]
|