[فيصل سعد]

[align=center]تعلمت من سواد الناس
كيف أكون برقاً بانتمائي لشعبي العظيم ...[/align]

[align=center][bimg]http://www.sudanyat.org/upload/uploads/mmmmm.jpg[/bimg][/align]

[align=center]تبرد غبينتك ولوعتك
طول الأزل
ويا روعتك
لامن تجادل دمعتك
دائماً تكون فوق العيون
مرحيبة بالداخل
عليك من دنيتك

عبّيت مصابيح الصباح
ببياض ضميرك و نيتك
بعرق جبينك و بنيتك
وبالشمشِ ما روق الرجال
وجّت جنائن غنيتك
ما كان رحيلك غير دليل
للجايي ماسك سكتك
يا شدو عصفورنا البسيط
كل الحلوق إتوكتك
إن ماب تبيت فوق السبيط
طوِّل مسافة ركتك

ما صمتك مطراً غتيت
لا ريح لديح .. يوم سكتك
عذراً إذا حال الوطن
بالجاتو ذات ليل بكتك
سايقين بأيادينا الزمان
شادِّين خيوطو الفكتك
يا بئر تكلة الناس عليه
وما قطَّ .. دلو
يي شنو إنهتك ؟

يا صاحنا في الزمن الغلط
يا سابلو دمك كالغيوم
لا صرَّ وشك لا عبس
إيش يعني لو سالن نقط
من كل عابر نقطة بس
يصبح شرايين الظلط
تبقى الشوارع أوردة
وجسد البلد عافية عريس
لاف العتامير قرمصيص
لأجمل عروس النيل رحط

و الكون صحابك و إنبسط
فاتحة صحابك ولاّ موج
دا برش فراشك ولاّ شط ؟
سيل الدموع الما انحبَس
في الواطة بيقوِّم تَبَسْ ..؟
شهى المدائن تنتفض
ما تمتعض ..

موكب زفافك للأرض
شهداء الوجود تتلقى ليك
محتفية بيك ... شوقة الربط
مركب شرط .. هوجة البحار
شايل خبار الهاربين
كان البشارة لكل شط

عِلت إبتسامتك حين هبط
ما من جواز غير راحة إيديك
لا من ربط عملة وشنط
نية رسول .. إنسان فقط
ما بينا بيناتك ربط
بي أسمى مبدأ .. وأقوى خط
ما جانا عشقك من فراغ
لا نحنَ غنيناك عبط
جرح الوطن خطالنا خط
ختالنا قول ما منو نط
والليلة يا موت يا حياة
خاتي البيختار الوسط !![/align]