[admin]

كتب خالد الحاج :

اللواء سعيد كسباوي يتحدث لسودانيات:

لواء طيار سعيد كسباوي

حاوره عصمت العالم / خالد الحاج


19 يوليو سماها البعض بالمقامرة الفاشلة ، ما هو رأيك في ذلك ودورك وقد ورد إسمك في أكثر من لقاء وأكثر من مقالة مربوطآ بالأحداث في كل من 25 مايو و19 يوليو ؟


اللواء كسباوي : كان عبد الخالق محجوب يفرّق بين الشيوعية والعمالة والمسألة دي عملت ليهو مشاكل مع السوفيت وإفتكروه –تولياتي- (1) فقامو ربوا واحد إسمه الطاهر عبد الباسط وأدوه دكتوراة في الإقتصاد حتي يحل محل عبد الخالق . من ضمن الخلافات بينهم كان الموقف من عبود إذ أن السوفيت كانوا بيفتكروا إنو ممكن يكسبوهوا وعملوا معاهو إتفاقية سلاح وأرسل الحزب معاوية إبراهيم لتوضيح رأي الحزب الشيوعي السوداني الرافض للتعاون مع عبود والإعتراف به. وحين وصوله أرسل معاوية تقرير يطلب تأييد عبود.
أرسل الروس الطاهر عبد الباسط ليحل محل عبد الخالق محجوب ..


سؤال : ما هو مصدرك لهذه المعلومة ؟

الكلام ده مصدره الشيوعيين الصينيين . وقبل التنفيذ كنت مع فاروق حمد الله مشينا لي نميري وفاروق قال لي نميري أنا قابلت الشيوعيين وهم رافضين المشاركة ومشينا خور عمر وكلمنا الضباط الأحرار محجوب برير قال أنا نورت العساكر ولا مجال للتراجع ومحجوب سمع بالإنقلاب في نفس اليوم الساعة 12 ظهرآ لكن الغريب إنو محجوب هو القدم إقتراح الإنقلاب في شهر مارس نفس العام وقال الكلام ده لي أنا وفاروق في فندق السودان قال هو ماشي الخلا لضرب نار تدريبي وإنو حا يرجع يعمل إنقلاب!! قال إنو فتح الموضوع مع بابكر عوض الله . قمت أنا سألتو خالد حسن عباس دورو شنو في التحرك قال لي بكتلو!!
قلت لي فاروق دي فرصتنا نشتغل فيها. يوم 24 مايو 69 مشينا أنا وفاروق لمنزل عبد الخالق محجوب ووقفنا العربية قدام الطرمبة وخبطنا باب عبد الخالق أنا عاينت بخرم الباب لقيت عبد الخالق وإتنين من المصريين
مخابرات مصرية حسب معرفتي محمد عبد الحليم وواحد تاني. جاء عبد الخالق وفتح الباب فاروق كلمو بالتحرك ، عبد الخالق قال ليهو لو نجحتوا بنأيدك لكن ما عندنا عساكر ولن نشارك. وكان عبد الخالق حذر تجاه نميري وكان منزعج للخلافات في اللجنة المركزية للحزب.
قامت الثورة وإنضم الحزب الشيوعي مؤيدآ. الحصل بعد كده إعتقلوا عبد الخالق ورسلوه مصر هو والصادق المهدي. ولما رجع إعتقلوه وختوه في مصنع الذخيرة في الشجرة. جا واحد من الإتحاد السوفيتي ونزل في سلاح الطيران وجا قابل عبد الخالق وعبد الخالق شتمه وقال ليهو لا نقبل تدخلكم في أمور الحزب.
لما سافر الشفيع لأعياد العمال في موسكو دار حوار بينو والسوفيت طلبوا منه أن يتصل بشعراوي جمعة علي أساس أن الحكومة المصرية تتوسط بين نميري والحزب الشيوعي. وأنهم حا يسحبوا عبد الخالق لأحد المكاتب الشيوعية الدولية ويحل محلو الشفيع كسكرتير للحزب الشيوعي. وجا الشفيع يوم 9 أو 10 مايو وقابل شعراوي جمعة . شعرواوي قال ليهو الموضوع ده –أوت أوف ديت- لأنو حايقوم إنقلاب ضد نميري بقيادة خالد حسن عباس وإنو في لواءين من القوات المصرية في جنوب مصر جاهزين للتدخل ودعم الإنقلاب. الشفيع إتخلع
كان السادات يريد عمل أي شيئ لإكتساب نوع من الشرعية كرئيس جديد بعد عبد الناصر.

كان في تنظيم في الجيش إسمو أحرار مايو بيجتمعوا أسبوعيآ وقدرنا ندخل فيهو زول ، سألهم عن أهداف وأهمية التنظيم؟ في ضابط إسمو حمودي قال ليهو : شوفوا يا جماعة بصراحة وبوضوح التنظيم ده غايتو هو دعم اللواء خالد حسن عباس. خالد ولع سجارة وسكت. وضح لينا أنو التنظيم بتاع خالد حسن عباس. في نفس الوكت مررنا المعلومة لي نميري.

سؤال من قام بتمرير المعلومة؟

أنا وصلت الكلام للرشيد نور الدين في صورة –قطيعة- وكنت عارف إنو حا يوصلها لي نميري. كنا متابعين ردود الأفعال . جاء خالد تاني يوم وقال ليهم الراجل ده –نميري- فجأة قال داير يحضر الإجتماعات وخالد كان خايف وقال ليهم ما تتكلموا في الغريق. وجا نميري وحضر الإجتماع وقال ده تنظيم جميل وتاني بيحضر معاهم الإجتماعات. وصرف أوامر لخالد بي تبليغو بي أي حاجة بتحصل في الإجتماعات وكان واضح إنو عايز يوري الضباط إنو هو القائد.

الشفيع بعد وصولو الخرطوم قام وصل خبر الإنقلاب للحزب ونسي موضوع إنو يكون بديل لعبد الخالق. تم إعتقال شعرواي يوم 15 مايو في ثورة السادات التصحيحية.

ماذا عن 19 يوليو سعادتك؟

قبل 19 يوليو وفي الإحتفال بي 25 مايو جوا إتنين من المخابرات المصرية وكانت عندهم أخبار مؤكده
بأن هناك إنقلاب حا يحصل ضد نميري. وكانوا بيقصدوا إنقلاب 19 يوليو ، وقعدوا مع نميري وقالوا ليهو أيه إحتمال حدوث إنقلاب ؟ نميري قال ليهم نحن بنعرف الجيش وقواتنا كويس وده إحتمال بعيد وأهو خالد قدامكم أسألوه كان خالد رئيس الأركان. فقال واحد من ناس المخابرات المصرية أنا لو كنت رائد بكتيبة واحدة ممكن أعمل إنقلاب!! خالد أستبعد ذلك تمامآ.
نميري قال ليهم لو في زول عامل لينا صداع هو عبد الخالق محجوب ونحن بنوديهو الجنوب وننقلو من حتة لأخري ونكتلو هو والحرس بتاعو!! قالوا ليهو دي خطيرة وبتعمل ليكم مشاكل. نحن عارفين عبد الخالق عايش برئة واحدة نحن بنديكم أدوية وإنتوا أطلقوا سراحو وبيموت في بيتو. الكلام جابو لي واحد من أحد السفارات العربية وقال لي تبلغو لعبد الخالق وكان هاشم ومحجوب طلقة بيقابلوا عبد الخالق مشيت معاهم وقابلت عبد الخالق ونقلت ليهو التقرير قال لي : أموت بالرصاص لكن ما بالطريقة اللئمة دي وكان في تآمر عليه من المصريين ومن السوفيت.
كان في طباخ خاتنوا لي عبد الخالق بيعمل ليهو الأكل وما كانوا عارفين علاقة النسب بينو وبين عبد الخالق كان هذا الرجل وسيلة الإتصال بين عبد الخالق والحزب، بدلوه وختو واحد تاني . أحمد عبد العزيز مدير السلاح الطبي إتصل بالحزب وقال ليهم في مؤامرة علي حياة عبد الخالق أنقذوهو.

عم مامون عوض أبوزيد وهو رائد مشا لي أب شيبة وقال ليهو أنا ما شايل مصحف لكن بثق فيك. مفروض المجلس يكون فيه خمسة أعضاء بس يتشالو إتنين ويتصعد ليهو واحد من الضباط الأحرار . أب شيبة قال ليهو أنا ما بعرفهم بعرف خالد وخالد لو قال لي أضرب زول بضربو . وخالد قال لي عم مامون أب شيبة راجل وأنا واثق فيهو إنتظروه بس.

لما قام التحرك ليوليو عبد الخالق هرب وما كان الهروب عشان يعمل التحرك هرب حماية لنفسو.
ومش غريب يمش لأب شيبة؟ لم يهرب عبد الخالق عن طريق الحزب هربوه أصاحابو بتخطيط برير وحسن التاج.
أب شيبة كان قاعد لما جا عبد الخالق قعد معاهو أربعة أيام وأب شيبة سفر مرتو عطبرة. وعبد الخالق قال ليهو فتش لي صلاح ميذرا . ويتأكد ليهو إنو بيتو ما مراقب.
تاني يوم الشفيع رسل لي محمد الجبة وحلف ليهو علي المصحف وقال ليهوتمش تكلم مامون مش أنا المسؤل التنظيمي ما عارف عن هروب عبد الخالق.
عبد الخالق ما كان قادر يفرز منو المعاهو ومنو الضدو.


سؤال: ما الذي حدث في بيت الضيافة ومن قام بالمذبحة؟ هناك أقوال عديدة ومتضاربة وصمت من العسكريين وحتي من تحدثوا لم يشهدوا ما حدث وإنما سمعوا بالحدث عن طريقة رواية البعض؟


التحضير تم بواسطة.. العقيد محمد حاج حسين ابو شيبه.وعبد المنعم محمد احمد الهاموش قائد اللواء الاول مدرعات...وكان سند الانقلاب من الحرس الجمهورى...ورفضت قوات اللواء الاول. صف الضباط الاشتراك..مجموعة..ازهرى جوده.والاحيمر...وتم تسريحهم..وحجر السلاح.....وهذا ما ادى بهم لتحرك بعد ذلك... وكان الشيوعيون ملتزمين براى الحزب فى التحرك..والتنفيذى.وهو ما ادى لبلبله فى التنفيذ..والتأمين
لان معظم الضباط كانوا بالمعش .محجوب طلقه . خالد الكد.وغيرهم

الضرب بيت الضيافة هم مجموعة حماد الإحيمر وأذهري جودة . اللواء بتاع الدبابات- تي 55- الروسية.
العساكر العملوا 25 مايو. شباب متعلم وكانوا طالعين من تجربة أكتوبر وواعين قاموا بي مايو 69 وكانوا متخيلين أنهم حا يلقوا حاجة ولقوا نفسهم مجرد عساكر. كان معاهم محجوب برير ومحجوب كان بيفتكر إنو هو العمل الإنقلاب وصاحب الفكرة. العساكر قالوا ليهو يا سعادتك نحن طلعنا ساكت ، قال ليهم ما تخافوا بناخد حقنا.
زميلنا المهندس فائز حسين أحمد حسين كان عامل دعوة عشاء في منزلو بمناسبة زواجو كان مزمل غندور من المدعويين قابلو محجوب برير وقال ليهو أنا بسلمك البلد دي بس قول لي أنا موافق. مزمل خاف ومشي لي جعفر نميري محجوب كان جادي لكن مزمل شك فيهو وخاف يورطو. قام نميري وداهم مصر بقيادة محجوب لدراسة –تي 55- وهناك إتوطدت العلاقة بينهم وجو جاهزين لي إنقلاب. محجوب قابل بابكر عوض الله وقال ليهو أنا جاهز وبابكر وافق ليهو لكن سعد بحر قام كشف المسألة وفصلوا محجوب من الجيش.


أما 19 يوليو فقامت بدبابات عبد المنعم محمد أحمد ودي دبابات إنجليزية لأنهم كانوا خايفين من العساكر بتاعين الدبابات تي 55 . قام العساكر بتاعين الدبابات تي 55 كسروا المخازن بتاعة السلاح وضربو القصر وبيت الضيافة. وإتفاجؤا بخروج نميري في ميدان كتشنر-ميدان الشهداء-
صلاح عبد العال ركب عربتو وإفتكر ديل "الزنوج الأحرار" ومشي الإذاعة وبدأ يردد لقد عدنا. العساكر لقوا محمد إدريس (دبابة) في الشارع قالوا ليهو ارح ذيع لينا البيان وقالوا ليهو نحن ثورة جديدة. بعد كده تم حل مجلس الثورة والعساكر أخدوهم ودوهم ليبيا لحضور إحتفالات الفاتح وخلوهم هناك. وعملو رئاسة الجمهورية.


سؤال: قال الرئيس البشير للحاجة نائلة زوجة الشهيد فاروق أن إعدام فاروق وبابكر النور تم في القيادة هل هذه المعلومة صحيحة؟

واحد من الناس النفذوا فيهم حكم الإعدام قال لي فاروق قال ليهم : للتأريخ الدروة دي أنا البنيتها فما تعدموني هنا فوقها ساقوهم بعيد شوية وقال ليهم هنا كويس. لما طلبوا منه يقبل قال ليهم أنا ما بتضرب في ضهري. وأعدموه

(1) زعيم إيطالي شيوعي كان له خطه المختلف من السوفيت.