صدور كتابي الأول، نصوص إسفيرية
عن دار ميمنة للإعلام بمدينة دبي للإعلام صدرت الطبعة الأولى من كتابي الأول نصوص إسفيرية والذي يحتوي على مذكرات ونصوص أدبية متنوعة تم نشرها سابقا بمنتدى سودانيات.
مقتطفات من الكتاب: بيت النمل نص قصير للكاتب النبيل: بابكر عباس قامت من النوم على صوت ناعم لتراكتر ماركة جون دير، إندهشت عدة إندهاشات! الإندهاشة الأولى والعظمى; كيف ميزت ماركة التراكتور من الصوت؟ وكانت قبل نومتا ديك بتقول للتراكتر بابور ولم تر غير بابور ناس ود الحرات، ولم يخطر ببالها قط أن لهذا الكائن العجيب أسماء وماركات! لقت نفِسا كمان عارفة بشكل دقيق سبب نعومة صوت الجون دير الجديد؟ يعود ذلك لنظام الجير (Gear) الجديد الذي لا يعمل بالجير بليت (Gear plate) القديم! وبدل أن تنخلع وتصيح بالقديم*: يا أبجلابية، لقت روحا بدل الخُلعة؛ مندهشة ورافعا كفينا لفوق والأطابع مفرقات، وشالت ليها نفس لأعلى وفاتحا عيونا وخشما بطريقة درامية وتصيح: واااو! * ما زال الطيب بشير يحتفظ بالحقوق الأدبية النص لسع ما إنتهى |
مقتطف تاني:
النبيذ الأحمر في حضرة شيوعي برجوازي بابكر عباس النص: أجمل عشا يعزموك ليهو يكون صاحب الدعوة شيوعي مقندل وراقي ويكون متزوج من أم درمان (ما ضروري هو من وين) و تكون معزوم مع شخصية معروفة. وكدي إتخيلو معاي العيزومة دي في دبي. - بت أم درمان بترتب العشاء جيهه شديدة - اللحوم بأنواعها - السلطات والمقبلات - الشوربات - كل أنواع المحاشي - التحالي - الشوك والملاعق والسكاكين ذهبية - كاسات النبيذ الأحمر الرسلوا جابوهو من البراكودا في أم القوين، لا لون لها وذهبية الحواف - التلج المكعبات والملاقط (عشان خاطر عثمان) سيد البيت اللابس ترينق أبيض مع بجامة عنابية بطلب من الضيف المشهور التقدم نحو السفرة بدأ العشا وفي واحدة سريلانكية مخصصة لمتابعة مستوى النبيذ في الكاسات, العشا أخد ليهو زي تلاتة *ساعات ونص، الضيف وسيد البيت بتكلموا عن لوحة تشكيلية معلقة في الصالون بالنسبة لي اللوحة عبارة عن دغمسة ألوان! أنا مشاركتي كانت بس كلمة ثانكس (شكرا) للسريلانكية لمان تتم لي كاس النبيذ الاحمر! يا أخي الناس ديل لمان الواحد يقطع ليهو قطعة لحم ويلحقها بسلطة وشرفة نبيذ ويواصل الكلام عن اللوحة بفم مليات بالخليط الأحمر، والله، يكسر ليك كل الإرث الإكتسبتو عن سوء الكلام أثناء الأكل! * مرة في العيلفون عزموني عرس جابو لينا صينية مليانة وكان معاي حيران، خمسة دقائق، نشّفوا الصينية وفكّوا لي أصبعي لمان مديتو للضلعة! شفتو النبيذ بهذب الناس كيف؟ |
التحايا يا زول لذيذ
أتوقع توزيع عالي جداً لكتاب المثقف بابكر عباس بعدين قبل ما أمشي اقتباس:
|
اقتباس:
وشكرا لمرورك الأنيق قبلي الطباعين طبعوا لأنشتاين نظرية النسبية |
مقتطف ثالث:
مدني الوسخانة بابكر عباس النص: قومٌ إذا استنْبحَ الأضيـافُ كلبَهُمُ قالـوا لأمِّهِـمو بولي على القُطُنِ شَحَّتْ ببولتِها، وهْوَ السَّمـادُ لهمْ بئس السمادُ وبئس القطنُ يا مدني محمد الواثق مدني بعيون زائر إيطالي في حدود سنة (1830): ريتشارد هيل مؤرخ أوربي نشر كتاب بعنوان "على تخوم العالم الاسلامي"، الجزء الأول منه عبارة عن مذكرات شخصية لمواطن ايطالي زار السودان في حدود 1830م و وصف مدني بأنها: تقع في منخفض شبة جزيرة سنار على الضفة الغربية للنيل الأزرق. معظم بيوت الأهالي من الطين و القش. تظل مياه الأمطار متجمعة في برك آسنة لمدة طويلة بعد موسم الأمطار (لسؤ التصريف الطبيعي) مما يؤدي لتكاثر البعوض و انتشار الأمراض المعدية. يقوم معظم الأهالي بقضاء حاجتهم على ضفاف النيل... عشان كدة القعاد على الشاطئ بيكون صعب خلاص و خاصة بالليل المدينة بصفة عامة قذرة الي حد البشاعة. يعني المدينة التي أسسها الشيخ محمد ود مدني السني قبل مئات السنين من هذا التاريخ يقال عليها إجمالا " قذرة الى حد البشاعة. مما يعني أن المجهود البشري المادي الذي بذل خلال تلك الحقبة ضعيف جدا و غير معنوي. |
اقتباس:
و أسي بتاعين (ميمنة) ديل على الدرب سائرون .... ما نورتنا على صورة الغلاف |
اقتباس:
يا زول، ناس "ميمنة" ديل، شكلهم قالوا يطبعوا ليك إلى حين ميسرة ساي. |
والكتاب تحت رعاية Gear plate
|
اقتباس:
قدم لي الأديب عثمان قصة: بابكر عباس، أديب خرج من رحم الأسافير، ليحتل مكانة مرموقة بين أدباء الواقع الخالي من دغمسة اللغة. إستطاع الأديب (أي بابكر عباس) أن يحول مرضه النفسي الكائن خلف شاشات الكمبيوترات في هجرته إلى تفاعل إيجابي دخل وإستقر داخل قلوب مُعجبيه وزرع الأمل في قلوب القراء. |
اقتباس:
بابكر عباس، أديب خرج من كمبيوترات العتمة ليضئ للكثيرين مناطق الحظر والقهر. إستطاع الأديب أن يستحدث أسلوب جديد لطرق المسكوت عنه بطريقة أسميها: اللولوة المباشرة |
ياخي (وكت) الله فتحا عليك، أكتب في مدني كلام حلو ياخ.
عليك الله سوق أم سويقو، وقهوة ود أب لبدة، واستاد مدني، وميدان بانت، ومدرسة الهوارة:D وأم بارونة، ونادي الخريجين، وسور حديقة سليمان وقيع الله(بالقديم)،والملجة، والسينما الوطنية، وحموري، وجعفر نوبة، وغير ذلك كثير، كلو يطلع (كيت) في كتاب الجن بتاعك ده؟ غايتو اتلومت الدار دي، باصر لينا نشرمع ناس دار (ميسرة)، كان الله يفتحا عليك بكلام كويس:D |
مبروك ....والف مبروك ...
ونكتفي بهذا القدر من المقتضفات حتي لايكسد الكتاب في السوق ... المهم فاتحه شهيه ممتازه لقراءه ادبيه مغايره وغير نمطيه ... اها رقم الايداع كم ؟ عشان نباصر دخول النسخ السودان |
لو في الكتاب، أي عمل (أدبي سياسي)أو (تدشينو) بتغني فيهو انصاف مدني، أعفي لي كلامي الفوق:)
|
اقتباس:
المهم كانت الطفابيع مخطوطة بخط نسيق، وهي قصة بديعة ذات خلق قويم، هذا البشرى جم التواضع، تصور بعد أن سافر بشرى إلى حيث يتلقى العلم، ضاعت الطفابيع من مكتبي، كانت فيما قد علمت من بعد، نسخته الوحيدة، خفت خوفاً شديداً. لعنت الذين لاحقوني. يطردونني من مقام إلى مقام آخر حسبما يشتهون. أخذت كل عفشي ورحلت إلى غير مقام. ضاعت الطفابيع، جعلت أتصور ما يمكن أن يقوله الناس. صدق بشرى كلامي. ابتسامته قراصة التمر، لا تضر القلب ولا المعدة، على كل جسده. تخيلت من الحاقدين جيوشهم تقول: علي المك لا يريد لبشرى أن ينتشر في الناس أتذكر كم كان حقد سالييري على موتسارت عظيماً.. سالييري كان مؤلفاً موسيقياً جيداً، ولكنه لم يكن عبقرياً، ولذا فقد لعن الزمان الذي جعله يعيش في عصر موتسارت. وحين خسر سالييري حربه الضروس قال كلمة الحق واعترف بالعبقري. ولست كمثل سالييري، ولكن بشرى يملك ذلك الناي السحري. والآن، عادت الطفابيع من جديد، ولانامت للحقد أعين. |
اقتباس:
أها ركز مع مداخلتي الجاية دي |
الساعة الآن 10:53 PM. |
Powered by vBulletin® Version 3.8.8 Beta 2
Copyright ©2000 - 2024, vBulletin Solutions, Inc.