عريس عريس -قصة قصيرة
1
صلينا صلاة العشاء في جماعة، ونحن لسع في البرش قال ليّ اخوي آدم، يا موسي، عليك الله، تخلي قلة ادبك وتبقي ود ناس، وامور الحرمنة والشفتنة دى تسيبها ولو مرة واحدة في حياتك، بس عشان خاطر امك المسكينة المشلولة دى، القاعدة في بيت احسن منه الكوشة، وكل يوم الحكومة (مكسراوْ)، عليك الله شوف قدامك ووراك وابقي زول! تنفع نفسك وتنفعنا معاك.. باب التوبة مفتوح يا.. موسي..؟ قلت ليو.. ربنا يهديني ويسترني مع الناس ديل..الزمن دا الشغل مابيتلقي بالساهل.. 2 جاء المأزون، قرأ قرآن كتير، ودعي ادعية كتيرة، صلينا وراه ركعتين لله، بعد داك عقد لينا كلنا العشرين في وكت واحد، بصراحة انا كنت ملاوز، ولكن اتذكرت كلام ادم اخوى: ياموسي الملاوز مابيكسب.. خت الرحمان في قلبك. لكن الشي الاقنعني اكتر لما شفت عروستي، كانت اجمل واحدة في العشرين عروس، لونها ذي اللبن، وصغيرة طويلة، وعندها شعر نازل حتي جعباتها، سمينة ولينة، وعيونها صغار ولكنهم لعينات ومغريات تقول عيون بت ابليس، كل مرة كانت تقول لي بدلع: ـ انت.. محظوظ ود كلب.. كنت بسكت ساكت، بعاين ليها وبتوعدا في سري، بامور عجيبة حا تعرفها في وقتها لمن نصل الفندق. انا مندهش من نفسي وروحي وحظي، الحافلة الكبيرة اللموزين المليانة باربعين من العرسان كانت بتجري بسرعة رهيبة علي الزلط المكسر في اتجاه (الجراندفيلتش)، بدأت الغناء عروس صوتها جميل، وكلنا عرفناها لما بدات اول مقطع من غنيتها.. وصرخنا في صوت واحد: ـ زهور القضارف.. زهور القضارف.. حتي عريسها نفسه اندهش، انا متزوج من اشهر فنانة شباب في السودان، وماعارف! قعدنا نبشر ونشيل وراها وننتشي، والعروسات يزغردن ويرقصن في مقاعدن، وفي عرسان شالتهم الهاشمية وباسوا عروساتم عديل في الحافلة وقدام الناس، بشرنا نحن عليهم وقلنا ليهم: ـ مبروك.. قلنا للسواق عليك الله يااوسطي ودينا جناين امتداد ناصر، نهيص شوية ونعمل حِتٍّة بارطي علي الاقل نتعرف علي بعضنا اكتر وبعدين نمشي الفندق.. قال لينا: ـ انا والله ملتزم بزمن لو ماكدا كنت وديتكم، ـ نزلنا كويس هناك ونحن نأجر لينا حافلة تانية عشان ترجعنا بطريقتنا الخاصة. الحفلة حفلة تاريخية.. الناس الكانو في رحل قدامنا خلوا فنانيهم وجو يحضروا حفلتنا، كشف شديد.. حت شديد، تجدع شديد..الم شديد، وصوت زهور القضارف بدون مايكرفون وبدون ساوند سيستم، بدون آورقن وايقاع، كان براهو اروكسترا، ولمان تقول ليك: جياشا.. جياشا.. ووب عليا انا، جياشا.. والجيش نقلو فتاشة، كّر علي، لو كنت زول صالح وتقي عديل زي ادم اخوي او المأزون العقد لينا زاتو، حتنمسخ. 3 جاء البوليس، بوليس النظام العام، سأل: ـ وين التسريح يا جماعة ؟ قالت ليو زهور القضارف، بعدما لمت توبا وجدعت يدينا الملآنات بالغواييش في الهوا ولوت شفتينا الكبيرات لويتين رايعات وصفقت: ـ تسريح شنو ياجنابو ؟ ـ تسريح الحفلة دى ؟ ـ سجمي ياجنابو.. انت مابتعرف القانون ولاشنو.. الحفلة العايزة تسريح الفيها ساوند سيستم او مايكرفون او مسجل عندو سماعات وصوتو عالي او اورقن او آلات موسيقية فيها سماعات.. ولكن دى حفلة بالخشم ساكت دى مافيها تسريح حسب قانون النظام العام لولاية الخرطوم 1999م المعدل في 2001م، ودوي التصفيق والصفير والكشف وهتف الناس بصوت واحد: ـ دا الكلام .. دا العلم! قال العسكري: ـ أنا حآوريكم القانون.. و اوريكم الكلام الما بتعرفوه والعلم الما سمعتو بيهو. ومشي عشان يجيب قوة إضافية، ونحن أخذنا الحافلة ومشينا الفندق. 4 لمان جينا الخرطوم ونزلنا من اللوري، قابلنا آدم اخوي ومعاهو صحبانو، وقسمونا..أنت تنفع تبيع موية.. وأنت تبقي مداح.. إبراهيم، أنت تنفع تبقي فنان شبابي.. بس احفظ شوية أغاني حقيبة.. أنت تنفع أمام جامع.. انت ياموسي تنفع عريس، ـ لكن انا مابعرف امثل.. رد لي سيد الوكالة مبتسم: ـ الحكاية ما تمثيل عرس جد.. جد .. بمأزون.. وقسيمة وكل شيء.. حتي شهر العسل.. تمشي تقضي شهر العسل حسب حظك في السعودية او الكويت او ابوظبي بس في شي واحد تعملو وهو المهم.. لمان تجي من شهر العسل تجي براك.. تخلي العروس هناك عشان الوكالة تاني تعرس ليك. [align=right]خشم القربة - فبراير 2003[/align] |
جميل أستاذ عبد العزيز
وهذا هو للأسف الواقع المرير... شيئ محزن إستخدامك للعامية في السرد رائع وطريقة إيصال الفكرة طريقة مبتكرة وغير تقليدية. بعيدا عن الجد : اقتباس:
أما أخونا موسي فالتوبة يا كده يا بلاش :D * * * رجائي مراجعة بريدك علي الهوت ميل - أرسلت لك رسالة. |
أخي خالد ، من أجل هذة القصة للأسف ، منع وزير الثقافة المجموعة القصصية (علي هامش الأرصفة) من التوزيع ، بل صادر كلما طبع وتم حرقه.
وقد قامت الأستاذة إشراق بنشر بعضها في سودانيات |
متابعين يا أستاذ عبدالعزيز
و الله أضحكتني رغم المرارة التي تقطر من القصة بسخرية مبالغ فيها قصة واقعية بدرجة 100% و أحزنني مصادرة مجموعتك القصصية كذلك لكن مهما فعلوا ها هو الفضاء الإسفيري يتيح لك النشر رغمآ عن أنفهم ف روما ليس لها طريق واحد تحياتي |
غير السرد الرائع للاسف القصه تعكس واقعنا اليوم
ولكن سياسة دفن الراس في الرمل ولك الود |
اقتباس:
|
أخبرتني حروف الصديق والصحفي الماهر: عصام أبو القاسم عنك بـ (فضاءات) حيث جاء بحروفك الملتفة بحرير الإبهاج والعمق في هذا الضرب (القصة)...
وعلى رغم صلتي البدائية أو الغير محسوبة بهذا المجال إلا أن هناك من الحروف بينها ما يسوقك إلى إكمال ما تصافح. كذلك رغم محاولاتي المتقطعة هنا وهناك في ذات المجال إلا أن علاقتي به فاترة إلى حد ما... وجدتك جميلاً كما وصفتك عبارات الجميل عصام حيث هنا شدني السرد والحبكة الدرامية والفكرة اللامعة كنصلٍ يغوص في خضم الواقع... لك المحبات والموفقية |
يابركة
جينا مسيدك نتبرك كتاباتك توقد الحياة فينا |
اقتباس:
عبد العزيز بركة الجيت.. |
| الساعة الآن 03:51 AM. |
Powered by vBulletin® Version 3.8.8 Beta 2
Copyright ©2000 - 2024, vBulletin Solutions, Inc.