تفاسير علمية لو سمحتو حول العلاج البديل
 

إستضافت قناة الشروق أمس في برنامج المحطه الوسطى بروف في معهد الناباتات الطبيه ، والأمين العام لإتحاد الطب الشعبي.. موضوع الحلقه كان حول عشبة المورينقا.. هل هي كما يشاع عنها ( بتشيل السكري ، وتخفض الضغط ووو )
أقنعتني حجة البروف القائلة بإنو هي مكملة غذائيه وماهي علاج.. بمعنى : مريض السكر بيلقى في العشبه دي البروتين والنشويات وبقية العناصر اللي مامسموح بيهو يتناولا.. فبتخلي معدل سكرو معقول لإنتظامو في البرنامج الغذائي.. تخليو معقول لكن ما بتساهم في علاج السكري
وفي الجانب التاني الأمين العام بتاع الطب الشعبي ، أشار لإنو العشبه دي إستخدموها آباؤنا الأوائل ، وبتلقاها في الكتاب الفلاني ووو وكل الدلائل كانت بتشير لفايدتها .. لكن بواقع الليله : يفترض نعرف : الجرعه كم ، والسميات كم ، وتخزينها ، وصلاحيتها وو
طرحت الحلقه دي بعد وفاة شابة كانت بتستعمل المورينقا لفترة طويلة ، وإتجمعت مويه تحت جلدها..
في غياب رقابة ، وحماية مستهلك ، وأرفف الصيدليات الفاضية ، وجيب المواطن الفاضي .. المواطن ما عندو غير ما يجازف العلاج الشعبي

أنا بشاهد في الحلقة دي ، طافت بذهني مجموعة بتاعة علاجات جازفتها لأنو الواقع الكنت عايش فيهو كان ماشادًي حيلو.. وماجاني سايد إفكت ، وهسي شديد ولضيض.. لا ينقصني شيئ سوى الإستيضاح العلمي :
بخصوص العقارب والأهل والأصدقاء :
• مرًه كنت شغال في كمينة جير كيًفتني عقرب في حنان حلتي ، من حسن حظي كنت شايل بصله خلا ، وهي بصله ما جادًه بتشبه البصله العاديه في شكلها.. هرست البصله دي ، وختيتها في محل اللدغه.. بعد نص ساعه واصلت شغلي زي الترتيب
• مره كنت منبطح في واطات الله ، ومكوًع بتكلم مع رفيقي في التايه.. لا عقرب جمل ( أم صوف ) كيًفتني في أباطي.. من حسن حظي : رفيقي كان شايل معاهو سن قرد ..وبيعتقد إعتقاد جازم إنو سن القرد بيعالج لدغة العقرب لأنو القرد أثناء بحثو عن لقمة شريفة من الدوم بيخمش معاهو عقرب عقربين وبمرور الوكت إكتسب مناعه.. المهم ماكان عندي خيار غير إنصاع ليهو خصوصاً إنو السم ماشي مشي صاح في جسمي.. أها الرفيق ده شال السن بتاع القرد ودفًاهو جمب لداية نار ، وتشًاني في أباطي.. وللغرابة .. في أقل من عشر ثواني حسيت بالسم نازل لحدي ماوصل يدي.. والعرق بدا يجف من وشًي..
• بلا فجأة في أقل من دقيقة الTwin بتاعة العقرب أم صوف وكلًابات قدر الضربة كيًفتني في كراعي ..
تاني السم بعد ما نزل ، أشوفو ليك طلع أباطي في وكت وجيز..
رفيقي قطع ضنب العقرب ، وبباقي سمها ليًس بيها اللدغة الجديدة في كراعي... وللمره التانيه السم نزل مني وشعرت بإرتياح..
بعد داك إتبرًع لي صديقي من تانيه تانيه ، ب (سيداب ) أنوم فيها .. لأنو الواضح إني زعًلت العقارب والأهل والأصدقاء لاسمح الله.

أما بخصوص ال Diarrhea
فكانت بتجتاحنا نوبة من الإسهال ، نتيجة لسوء التغذية أو قطع الجمار المالي الفجًه بملحقاتو من ضبًان وضبًان صف ، كانت في عدًة وسائل لإيقاف مد الإسهال قبل ما يقوم بيك :
1- يا إما تقع لحاء السدره ( النبق ) وتغليها كويس ، وتجغًم منها إلى أن يشاء الله
2- يا إما تنيش ليك كيكو ( يشبه السنجاب ، بيعيش في كراكير الجبال ، أو بشكل أكتر دقًه : هو عباره عن فار حجم عائلي ماعندو ضنب ) وتاكل لحمو.. لأنو بيتغذى على عشبة بتتوقف الإسهال
3- أو تاكل أبو القدح.. لأنو بيشاطر الكيكو وجبتو الغذائية ( العشبه البتوقف الإسهال )
ملحوظة : جرًبت التلاته وسائل ديل ووقفن الإسهال

بخصوص الجروح :
إشتغلت كسأر صخور لفترة كبيره في جبل ، وكانت من وكت لتاني روايش الصخور بتخت بصماتها في جسمك .. أغرب مافي الموضوع إنو لو إتجرحت ما عليك إلا تستعمل بودرة الصخره دي ، وتردمها في الجرح ، وبالرغم من غرابة الفكره إلا إنو ماعندك حل غير ما تستعملها..
ملحوظة :إستعملتها لفترة طويله وماحصل إتقرًح جرح أو شال (مده)

يللا باللاهي العندو تفاسير علمية يجي بيجاي

سلام يا بنج
واضح إنك ما أخدتَ صفة البناجة دي، من ساهِل والله:D


__
غايتو أنا ما عندي ليك أي تفاسير علمية؛ لكن جنِس عقاربك وعلاجاتك السّوّيتِن ديل، يا بركات المكاشفي اندفقت فوقك، يا اتجلّى فيك الشيخ حسن ود حسونة، أب حُجة مدفونة:D

سلام يا بنج،،
التفسير المحتمل بالنسبة لي، الصخور عموماً بتتكوّن من معادن، أهمها، الفوسفيت والكالسيوم ونحاس، و...إلخ
الكالسيوم واحد من أهم المكونات في جسم الانسان وبعمل في جبهات مختلفة..
من ضمن مهامو:
- بيدخل بشكل مباشر كعامل مشارك وأصيل في عملية تجلُّط الدم، يعني في حالة الجروح، عشان الدم يقيف، مفروض الكالسيوم يدخل في العملية دي..
- بيدخل بشكل أساسي في عملية تكوين البشرة في مرحلة من مراحل التكوّن دي، عشان الجرح يبرا..
الصوديوم والكلور في حالات معينة وفقاً لارتباطات مع معادن تانية، بعملن كمطهرات ممتازة، زي الصوابين الحايمة دي.:D

الاسهالات ما تبعنا، نحن تخصُّصنا جروح:D

انا موجود، خفت أقول ليك انا (قاعد)، تقومو تفهمونا غلط:D

يا شليل عندنا الخريف فى الجزيرة العقارب بتطلع
و بتلدغ الناس كتير
فى نوع من العشبة اسمها عرق العقرب
امصها الزول
فى ناس ببقو كويسين و ناس لا
احيانآ الموضوع نفسى اكتر من انو علاج ذو فعالية
زى موية راتب المهدى

دي الحاله إنتي دكتوره وأنا عشمان في تفاسير منك
ياخ عليك الله إتصلحي معانا

يا أخواننا إجتهدوا معانا في إعتقادات الجنقو دي
لأنو أنا جربت كل البدائل المذكوره في البوست ده ، لفترة إستمرت حوالي 6 سنوات وغطًت معاي

بمناسبة بركات دي يابنج.. لازمني migraine لفترة طويله ، وأي إزعاج أو ضوء بيطلًع عيني .. جرًبت كل الأدوية الممكنه.. يوم متضهًب في الشوارع لقيت ليك عمك دجال فارش ليهو كمو عود ، وخاتي جمبهم كمون وشوية أرنجات.. أها أخوك عينو ضلًمت ، قلت أجرب أشوف عمك ده..
- سلام عليكم
- وعليكم السلام
- ياخ عندي شقيقه متعباني شديد
- سداع جمبه
- أيوه سداع جمبه
شال ليهو ورقه ، سطرها زي تسطير السيجه ، شخبت شخابيت ، قلم ليهو عود.. دقاهو بحجر.. قال لي : المساء تستنشق بودرة العود ده مع كمون ، وإن شاء الله عوجه ما تجيك..
أخوك إستنشق وقنعان من خيرا فيهو..
وحاتك من الإستنشاقه ديك في 2004 ، لحدي الليله الصداع النصفي ما هوًب علي.

أيوه كده.. عفيت منك يابنج ، مافي كلام
يللا يا شباب إجتهدوا معانا في العلاجات البديله دي